尋找人哋家鄉味食編 4 大心水推介

發佈: 2016.11.04
文:

米芝蓮推介潮式腸粉
曾獲米芝蓮推介的餐廳,主打潮州地道小食。老闆係潮州普寧人,店中所用食材和醬料大都由潮州運來,風味正宗。極力推介潮式腸粉!
潮式腸粉 ($40)
齋睇賣相,唔似腸粉!外形好盞鬼,似鬢辮,捲起來幾厚身,但質感有彈性。腸粉內包住蠔仔、蝦米、土魷、雞蛋及生菜等餡料,加上鹹鹹的芡汁,豐富惹味;食起來感覺似濕炒河粉!
潮式招牌鮮蠔仔粥 $55(小)
分量大,有 3 至 4 個飯碗。蠔仔味鮮甜,且每粒都脹卜卜,再加上土魷同煲,好香口!必食!
潮式腸粉
地址:元朗鳳翔路 69 號建輝大廈 5 號地舖
電話:2418 9638
營業時間:8am-11pm
【相關報導】
北方姐姐自家包餃
最能夠代表北方人的小食,一定是餃子。其實好多香港人都鍾意食餃子,除了好味兼方便,不同餡料亦代表不同地方飲食文化。呢間位於太子的「大姐」,員工幾乎全是操北方口音的姐姐,每次去到都見到佢哋喺店內包餃子,感覺地道之餘又新鮮。除了大路的韭菜、白菜餃外,這裏有北方人至愛的茴香餃、羊肉串及老醋木耳等小吃。
茴香鮮肉餃拼津白鮮肉餃 $42(10隻)
個人認為餃子最重要是皮,餃子皮厚薄適中,不會一夾就爛,口感煙煙韌韌有彈性,亦不會食飽飽滯,讚!兩款餃子肉汁充盈兼夠味,基本上不用配醬料已經好吃。
茴香鮮肉餃
茴香有獨特的香草味,混和豬肉,增加口感外,令豬肉味更香。
津白鮮肉餃
津白餃子則較像白菜餃,味道甜甜的,水份很多。
北方打滷麵 $38
最初以為是滷味加麵,原來是蛋花湯麵;自家工場製作的上海麵,口感彈牙;加上肉片、木耳及蘑菇等同煮,望落有點似大雜燴湯麵,味道清淡,有家的感覺!
大姐山東餃子館
地址:太子花園街 224 號 C 地舖
電話:2766 0282
營業時間:11am-11pm
【相關報導】
超長!陜西 BIANG BIANG 麵
陝西盛產小麥,最常吃用麵粉做的麵條、包子、饃;來自陝西西安的老闆娘,在佐敦開小店賣這些家鄉風味,就連食家蔡瀾都讚好。主打陝西美食,很多人都為它的 Biang Biang 麵而來,因為呢碗麵,每碗只得一條,好過癮!
Biáng 麵 $38
Biang Biang 麵用高筋麵粉、鹽和水製造,麵條長約 1 米,寬約 4 厘米,厚約 2、3 毫米,又寬又長似皮帶,原條原碗上!拌辣椒(當地人稱辣子)、滾油、芝麻吃,重口味是最大特色;配料方面,可選金沙骨、餃子、雞翼等,豐富得多,迎合香港人口味。
臘汁肉夾饃(前)$22、陝西涼皮(後)$30、冰峰 $16
店內另一必點是肉夾饃。暖烘烘,滿嘴滷水豬肉香,外脆內嫩,一咬肉汁肉香澎湃;涼皮爽中帶韌,跟青瓜醬料拌吃,清爽。至於冰峰是當地知名汽水,像減甜版「芬達」。
地軟炒雞蛋 $48
陝西小炒,材料有雞蛋、地軟(別名地木耳)及青瓜,簡簡單單的,又軟又爽脆。
乾拌臊子棍棍麵 $50
又名「拉條子」,人手做,條條有粗有幼,比 biang biang 麵更有嚼勁,配料有薯仔、芹菜、冬菇、豆腐及豬肉等,醬汁帶點辣,拌起來吃很惹味。
有緣小敘
地址:佐敦文苑街文耀樓地下 36 號
電話:5300 2682
營業時間:星期一至五 12nn-10pm,星期六、日及公眾假期 12:30pm-10pm
先辣後麻四川薯粉
「香辣四川」位於屯門一個屋苑內,位置隱蔽,雖然舖面細細,但麻辣菜式種類頗多,麻辣牛肚豬心豬舌豬耳水煮魚雞煲乜都有。老闆娘來自四川,店內的麻辣都係佢親自調味,入口先辣後麻有層次。而老闆娘亦會因應客人口味而調較辣度,分為大、中、小辣。若想試正宗四川味道,佢推介大辣。
夫妻肺片湯薯粉(小辣) $40
有肺片、牛肚,足料。麻辣湯香濃,湯面浮起一層辣油,因為是小辣,辣度溫和,配料除有肺片外,還有牛肚,吃起來爽口,分量頗多。
薯粉煮到透明狀態食落煙韌彈牙,吸收了麻辣湯味,入口唔覺麻,但食完後會感到嘴唇微腫,好味兼過癮!
口水雞(中辣) $40
雞肉加青瓜絲,配上中辣麻辣醬,入口即有麻痹感,有麻勁又有辣香,唯嫌雞肉不夠入味,感覺似食緊落咗醬汁的手撕雞。
【相關報導】

香辣四川
地址:屯門置樂花園 6 座 99 號地舖
電話:5535 1812
營業時間:11:30am-8:30pm,逢星期一休息
文、部分攝影:Froggie
【相關報導】

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more