放縱食!4.5 小時任食牛扒 + 火鍋

發佈: 2016.11.09
文:

觀塘嘅「開餐達人」之前推出 $88下午茶、$138任食素火鍋已經平到笑;當你以爲係破抵價時,佢話你知低處未算低!最近餐廳加碼推出最平 $158/ 位(設加一)嘅任食牛扒加火鍋放題!啱晒啦!聽日就跌到得16度,仲唔約frd子瘋狂打邊爐?!
「開餐達人」以 80 年代香港做主題,周圍都放咗好多釣魚機、五子棋、 飛行棋等兒時小玩意,仲有個「龜背」電視機及紅白遊戲機,加埋個抗通脹收費,真係以為時光倒流 20 年!
【糧尾推介】 糧尾必備 IKEA 抵食拼盤
4.5小時嘅瘋狂任食,建議早至少一日訂位,等餐廳準備足夠食材。睇睇張點餐紙,選擇唔少!單係火鍋湯底都有3款, 火鍋配料總共48款任揀,記得空肚食晚餐!
飲品都係任飲,汽水之外仲有每日兩款特飲。
你想食辣,佢又想酸咪咪,我想清啲……唔使爭啦!火鍋煲分成 3 格,可以食晒 九州豬骨濃湯泰式冬蔭功西班牙番茄湯 3 款湯底。
大路嘅豬骨濃湯,放咗大大嚿白蘿蔔吸湯。
西班牙番茄湯用咁大個肉茄切粒熬煮,茄味濃郁,酸咪咪好開胃,加埋台灣百頁豆腐吸味,正!
打邊爐最緊要有肥牛!呢度選用 美國肥牛,每塊都有肥膏有牛肉,唔會一味肥。
前面是 羊肉片,脂肪唔多但肉質好軟熟,帶少少羊羶味, 放入冬蔭功湯食味道最夾。後面嘅 牛舌粒又腍又有牛嘅油脂香,煮耐咗都唔會硬到崩牙。
要吸盡火鍋湯精華,揀爽彈 豬皮就最啱!必食仲有新出嘅鵝腸,雖然裏面甘香肥膏刮走晒,但入口不失爽脆。
丸類都唔馬虎,特別由台灣直入 5 款丸類。呢粒台灣 Minions 芝心包,哎喲!個樣好特意呀!入面仲要係超流芝心!要勁食!
另一款 台灣芝士龍蝦丸都好有內涵,一咬開芝心即唧出嚟,小心辣親嘴仔!
台灣飛魚籽魚蛋腸,一邊咬一邊有飛魚籽嘅脆脆口感,好過癮!
麻吉燒,即係 年糕魚餅;中間嘅年糕受熱後變成軟心,煙煙韌韌。後面係一口芝士豆腐,有芝士鹹香,加埋湯汁,好惹味。
甜品唔好錯過呀!呢個靚靚嘅 Tiffany Blue 雪糕,係 沖繩鹽味。食落味道鹹鹹哋,雪糕唔過甜又唔膩,重點係影相夠吸睛。
食到飽嚟個中場休息,玩吓緊張刺激嘅電流急急棒啦! 成功過關仲有禮物㖭!
玩完再食過,呢round主攻牛扒! 美國牛扒每塊重約 8 安士,即係半磅重,唔係營養不良牛扒嚟㗎!
牛扒中間仲有啲粉紅色,咬落不乏肉汁。
牛扒長近 8 吋,食兩塊已經好飽!
地址:觀塘開源道 47 號凱源工業大廈 1 樓 B 室
電話:3689 2496
Whatsapp 訂位電話:5910 5085
晚市 4.5 小時牛扒任食 + 火鍋放題供應時間:6:30pm- 11pm
收費:星期一至四 $158/ 位、星期五至日 $168/ 位,設加一
文:Jessie 攝:Brian

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more