$70 有找!4 大高 CP 值鰻魚飯

發佈: 2016.11.13
文:

手掌咁大鰻魚飯│小卷廚房
食鰻魚飯唔一定要去高級日本料理店,好多小店都有得食!於紅磡寶其利街嘅「小卷廚房」,有一班街坊粉絲。小店係外賣店,店門外有一張枱仔畀你即場開餐。

鰻魚飯 $40
呢個鰻魚飯已經係全場最貴!鰻魚即叫即喺廚房嘅鐵板上煎香,有手掌咁大條,$40 真係物有所值!
鰻魚比較軟腍,口感綿綿的,係鐵板上煎過,鰻魚帶焦香味,有魚脂嘅香氣。
飯就比較失色,唔係用日本珍珠米。飯味唔太香甜,不過飯嘅分量勁多,大男人都食得飽。
小卷廚房
地址:紅磡寶其利街 53 號寶利閣地下 1 號舖
電話:9315 4455
營業時間:11:30am-11pm
味道有層次│菊月町
觀塘鴻圖道嘅餐廳,貴到杜汶澤都要上網鬧爆!或者佢真係火遮眼,其實喺鴻圖道都有平嘢食,仲要係日本菜!「菊月町」晚市有 $800 廚師發辦,但午市食物價錢好鬼平,鰻魚飯、牛肉生薑燒飯、豚肉生薑燒飯都只係 $58,仲跟甜品!買完飯仲可以行 5 分鐘去觀塘海濱食,吹吓海風好寫意!
蒲燒鰻魚飯 $58
鰻魚飯即叫即製,唔係預先做好,有柯打就放上飯面。鰻魚食落仲係暖暖的,魚腥味都少啲啦!
鰻魚質地唔係平時食慣嘅軟腍腍,比較爽彈。鰻魚唔油膩,魚肉白淨新鮮。鰻汁不會一味死鹹,微甜、醬油味偏重,有層次。
飯是日本珍珠米,帶有甜味,但飯粒比較硬及乾,好在廚師加入沙律醬,再拌鰻魚汁,增添濕潤感又令味道層次更豐富。
菊月町
地址:觀塘鴻圖道 46 號世紀工商中心地舖 1A
電話: 6588 5354
營業時間: 11am-10pm
葵廣巨型芝士鰻魚飯│Happy Toast
葵涌廣場真係乜都有得食!鰻魚飯呢啲熱門嘢又點會少呢?係 2 樓嘅 Happy Toast 憑住紫薯牛角包及半條鰻魚牛角包,喺葵廣站穩陣腳。上星期推出芝士滑蛋鰻魚蓋飯,即衝去食!
芝士滑蛋鰻魚蓋飯 $60(試食價)、$72(原價)
又話 $70 有找?係呀,而家 like 佢哋嘅 Facebook 專頁就可以用試食價 $60 食到。
鰻魚 size 一啲都唔細!成隻餐叉咁長,大約 6cm 左右。
炒蛋即叫即炒,蛋味濃郁,食落好滑又唔油膩。不過記得早啲開蓋食呀,好易焗到變老蛋!
飯係珍珠米但米味唔太突出,鰻魚汁質地濃稠,偏甜口,醬汁味香。鰻魚肉厚身、肉結實,魚皮嘅脂肪比較多,好甘香惹味,但芝士味偏少。
Happy Toast
地址:葵芳葵富路 7 號葵涌廣場 2 樓 2005 號舖
電話:從缺
營業時間:12pm-10:00pm
任添鰻魚汁│和食快餐
位於荃灣昌寧商場嘅「和食快餐」,出晒名大大碗飯、大堆頭嘅餸,食到捧住個肚走。食唔晒,可以打包返屋企當宵夜,抵啦!
鰻魚飯 $58
鰻魚大大塊,同個碗一樣咁長,魚肉仲好厚身但食落又唔油膩,鰻魚汁仲任加任添,一啲都唔孤寒!
和食快餐
地址:荃灣西櫻樓角路荃昌中心昌寧商場地 下23 號鋪
電話:2413 0678
營業時間:9:00am-9:30pm
文、攝:Jessie

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more