熊本祭開催 部長變身火鍋店長!

發佈: 2016.11.14
文:

踏入火鍋季節,餐廳唔出盡法寶都好難吸客。一年前登陸香港嘅日本人氣 Shabu Shabu 專門店溫野菜,趁就快 1 歲生日,搵嚟人見人愛嘅熊本熊 Kumamon 做期間限定店長。
 
尖沙咀及銅鑼灣分店將於 11 月 22 日開始,連續 3 個月舉行「溫野菜熊本祭」。雖然部長唔會現身跟大家見面,但整間餐廳都放滿部長嘅萌爆嘜頭,粉絲們唔好錯過跟部長瘋狂 selfie 嘅機會!
 
門口都有 Kumamon 紙牌,連部長都忍唔住影返張合照!
 
熊本祭熱身派對當日,部長仲好落力做好店長份工,幫手拖地、無搞搞震。
 
轉個頭又幫手抹枱,隔離嘅小妹妹好滿意部長嘅表現啵!
 
雪見鍋定食 $358
開餐時間!部長帶咗好多嚟自熊本縣嘅食材畀你品嘗 Shabu Shabu。部長太搶 focus,等我再 close up 啲食物畀大家睇啦!
 
 
前菜有 辣味芝士、黑糖蠶豆外,仲有由熊本直送嘅 鹽醬麻香椰菜。椰菜色澤翠綠,爽甜多汁。
 
熊本縣嘅 白蘿蔔是繼部長之後,最出名嘅產物之一。期間限定嘅雪見鍋是日本嘅著名鍋物,大廚於骨膠原鹽湯上,加入大量熊本蘿蔔蓉,半透明嘅蘿蔔蓉就好似白雪,好浪漫呀!熊本蘿蔔蓉味道清新、不帶苦味或辛辣味道,好適合作火鍋湯底。
 
熊本豚梅肉(跟餐一客)
熊本豚肉質素不錯,雪見鍋定食內包括熊本豚肉眼、熊本豚腩肉及熊本豚梅肉各一客。熊本豚梅肉嘅肉質具彈性,有咬口。
 
熊本豚腩肉(跟餐一客)
追求入口即融,豚腩肉就啱你心水。豚腩肉脂肪比例較多,入口肥而不膩,甘香豐腴。
 
 
熊本豚肉眼(跟餐一客)
肉眼嘅脂肪比例最少,但質感軟綿有肉香。
 
美國牛肋肉
套餐另可於美國牛肋肉及丹麥雞腿肉二揀一。美國牛肋肉灼 20 秒食得,牛味突出又有咬口。
 
野菜是餐廳皇牌,套餐有日本直送嘅 生菜、本菇、啡金菇、水菜紅心蘿蔔
 
竹筒免治雞肉
免治雞肉結實有彈性,混入細碎的雞軟骨,增添脆脆口感。另有木棉豆腐、燒魚卷及葛絲、烏冬或白飯等火鍋配料,每款一點點,已經好豐富。
 
 
凡柯打雪見鍋定食,加 $90 即可換領 Kumamon Shabu Shabu Pot,限量 1,000 個咋!影低餐廳嘅部長蹤跡,再上載至個人 Facebook 即可免費有熊本椰菜一客!
 
溫野菜
地址:c廣東道 17 號海港城海運大廈 LCX3 樓 37A 號舖 / 銅鑼灣 Plaza 2000 4樓 全層
電話:21531801(尖沙咀店)、3709 8328(銅鑼灣店)
營業時間:11:30am-11pm(尖沙咀店)、12nn-11pm(銅鑼灣店)
 
文:Jessie 攝:Chow
 


歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more