4 大人氣小籠包 邊間最爆汁?

發佈: 2016.11.21
文:

一個好味的小籠包應該要……
外皮:厚薄適中,同時能承托包內湯汁。尖端位置不能太大太厚,外皮皺褶要工整,賣相才靚。
餡料:大小分量適中;肉餡最好用新鮮豬肉製,有肉的鮮味,質感鬆化有咬口,調味適中。
湯汁:有充盈湯汁卻不能太油膩,有肉的鮮甜味,分量大約一湯匙為佳。

明星出品 ┤正宗上海生煎皇├ 10 分
灌湯小籠包 $32/4 個
由前組合 Bliss 成員蕭潤邦開設的小店,開業以來 Oscar 都親力親為在店中打點,除咗馳名生煎包,灌湯小籠包亦非常受歡迎!因為水準穩定,分店愈來愈多。最近他更有新搞作,將小籠包做成七彩顏色之餘,還加入海鮮做材料。
用筷子夾起,可見到小籠包外皮軟身,仲隱若見到裏面嘅湯汁,做到薄身而不易破。但每個大小形狀不一,形狀不夠渾圓。
肉餡係 4 款小籠包之中最深色,味道果然偏濃,稍稍偏鹹;而且口感有點軟腍鬆散。
湯汁亦是 4 款之中最深色,分量大約半湯匙,肉味香濃。
小評:
外皮:★★★ 餡料:★★★
湯汁:★★★★ 總分:10 分
地址:旺角豉油街 72 號地下
電話:2323 2374
營業時間:12nn-12mn
散點放題水準如一 ┤翡翠拉麵小籠包├ 11 分
上海小籠包 $38/4 個
喜歡吃滬菜的,對連鎖品牌翡翠拉麵小籠包一定不感陌生。早排餐廳更首推放題,食客爭相 book 枱,雖曾掀起關公災難,但及時成功拆彈。小籠包無論是散點或放題都 keep 到水準。
小籠包形狀不統一;夾起在燈光下一照,外皮厚薄適中兼透光,依稀見到肉餡和湯汁,不俗。
肉餡內有點點肥肉,口感有層次之餘,有油脂甘香;肉味鮮甜有口感,不鬆散。
湯汁不多,大約只有 1/4 湯匙左右。
鍾意重口味嘅話,點少許醋吃,可加添肉鮮味。
小評:
外皮:★★★★ 餡料:★★★★
湯汁:★★★ 總分:11 分
地址:銅鑼灣勿地臣街 1 號時代廣場 B2 樓 B221A 號舖
電話:2506 0080
營業時間:11am-11pm
註:設加一
旺角出沒神奇小籠包 ┤尚香├ 7 分
旺角開業不久,即引起話題。來頭勁猛,在北京、廣刬和上海約有 30 間,其江蘇靖江店更曾登上《舌尖上的中國》。老闆 Coco 和 Jacko 看好這包子,於是在香港開店。招牌蟹黃湯包,皮只有 1mm 薄,不少於 30 個褶口,裏面還有約 100ml 湯汁和 1.2 兩左右的大閘蟹蟹肉蟹膏,湯汁多到要用飲管啜。店中亦普普通 size 的蟹黃小籠包和鮮肉小籠包,外皮也標榜 1mm 厚,湯汁約佔3 成,混和豬肉,不是台式那種肉少湯多的。
全店只賣 4 款食物,但開舖無耐已有 2 款售罄,係人氣之選。
買完之後,店員會畀一個號碼牌,仲有隻蟹仔喺上面㖭,有趣!
鮮肉小籠包 $35/5 個
分量大小同一般小籠包相若,但 $35 有 5 粒,抵食!外皮又厚又硬身,口感不好。
內裏嘅豬肉味勁濃,濕潤得嚟好實在,而且肉餡入面仲有葱花,不油膩。
湯汁只有大約半湯匙左右,很少;顏色、味道偏淡。
小評:
外皮: 餡料:★★★★
湯汁:★★ 總分:7 分
尚香
地址:旺角廣華街 1 號仁安大廈地下 G1B 號舖
電話:2481 8686
營業時間:12nn-10pm
米芝蓮一星台灣過江龍 ┤鼎泰豐├ 13 分
小籠包 $60/6 個
最後一間,就係台灣過江龍小籠包名店——鼎泰豐!呢間不用我多介紹,舖頭已連續多年摘下米芝蓮一星,店中小籠包水準和服務質素超穩定。
4 款之中,鼎泰豐嘅小籠包賣相最統一,每粒 size、形狀都一樣!用筷子輕輕夾起,立時感覺到裏面嘅肉餡墜落,小籠包外皮厚薄得宜,感覺有韌性,足夠承住湯汁不漏,食落又煙韌,不會一口粉兼糊口。
肉餡好鮮甜,食得出係用新鮮豬肉製造,而且入面混入肥肉,食落好香口!
湯汁顏色偏淺,油分不算太多,味道清鮮。
喺點心籠入面放一塊絹布,客人容易夾起小籠包又唔怕黐底,很貼心。
除咗原味小籠包,這裏還有 黑松露、絲瓜蝦仁以及雞肉口味小籠包,滿足貪心、鍾意追新嘅食客們!
小評:
外皮:★★★★★ 餡料:★★★★
湯汁:★★★★ 總分13 分
地址:銅鑼灣怡和街 68 號地下 G03-G11 號舖
電話:3160 8998
營業時間:11:30am-10pm
註:設加一
總評:鼎泰豐 勝!
雖然結果無乜驚喜,都係大家熟悉的鼎泰豐贏,但其小籠包的確實至名歸。外皮薄得透光,卻又韌力十足;肉餡新鮮,有肉味又 juicy,湯汁鮮甜。最難得是每次幫襯水準如一,唔怪得多年來摘咗咁多粒星啦!
文、攝:Joyce

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more