西貢趁墟!廟會 12 大必掃小食

發佈: 2016.11.17
文:


點解無端端有市集?等我講下背景先啦!位於西貢宜春街的西貢天后關帝古廟,重修歷史已可追至 1916 年,去咗咁多次都唔知,現時已被評為二級歷史建築,為紀念重建一百週年,就舉辦咗 6 日慶祝活動,最吸引吃貨的,當然係逾 40 檔攤位市集啦!
 
市集有 40 多個檔攤,小食選擇超多。
 
西貢天后關帝門外搭棚上演粵劇匯演,第一日已人山人海。
 
咁多檔攤,究竟有咩好食?我已經幫你 pick 咗喇!有串燒、手工雪條、一口牛、金蠔、真.章魚丸等,檔檔都好吸引!
 
1 即撈!火焰芝士黑松露螺絲粉 $35(攤位編號:53 Fruttato Bakery)
 
見到檔前好大嚿 Mozzarella 芝士,原來係整 火焰芝士黑松露螺絲粉,先在芝士上倒烈酒,再點火略燒,同時將炒好的煙肉黑松露螺絲粉再放上芝士磚上沾勻,視覺效果一流,芝士味又 rich!
 
2 得意冰火雪糕泡芙 $35(攤位編號:53 Fruttato Bakery)
泡芙有竹炭、綠茶、牛油、朱古力等味,而自家製雪糕有榴槤、香蕉、朱古力味,每日口味不同,食落外脆內凍,好得意。
 
手工雪條有芒果、士多啤梨、益力多等味,圖中係蝶豆花味雪條($25),紫色外表好靚。
 
 
3 香噴噴芝士玉子燒 $38(攤位編號:43)
 
行到攰攰哋,可以食 芝士玉子燒填下肚,加咗 Mozzarella 芝士及蟹柳炮製,再鋪上木魚絲、沙律醬,鹹中帶甜,蛋香中又滲出芝香,好好食!
 
4 好香口!燒安格斯牛肉粒 $30/4 粒(攤位編號:43)
 
喺同一個攤位,有燒牛肉粒食。用美國安格斯牛製,每粒最少 1 吋 x 1 吋咁大,好大粒!燒得香口,入口牛香和肉汁爆破。
 
5 秋冬最啱食!柚子金蠔 $40(攤位編號:29)
串燒金蠔肉身飽滿,串燒更香口,塗上柚子蜜烘燒,滲滿果味反而更清香。
 
6 地中海松露芝士大蘑菇 $20/ 隻、$30/兩隻(攤位編號:45)
用 Mozzarella 及 Cheddar 雙重芝士及克羅地亞黑松露油焗煮,做到拉絲效果,不過略嫌蒸煮唔夠香口,變作串燒更好。
 
 
7 真.章魚燒(攤位編號:46)
 
原隻章魚仔放落粉漿烤成 「真.章魚燒」,原隻特別有咬口,但粉漿略嫌薄身。(同攤位小食 $40/ 款、$60/ 兩款)
 
8 香甜蒲燒鰻魚(攤位編號:46)
蒲燒鰻魚燒汁惹味,咬落好香口,唔太多骨。(同攤位小食 $40/ 款、$60/ 兩款)
 
9 好閃呀!大大杯果汁沙冰(攤位編號:46)
食完小食好熱氣好口渴?不如飲杯果汁沙冰!有選擇困難症者,喺呢度好難揀到果汁口味,有 12 種味, 士多啤梨、藍莓、青檸、香蕉等,做成大大杯梳打,最特別係桶內有閃燈粒,夜晚來飲閃爆全場。
同攤位小食 $40/ 款、$60/ 兩款
 
10 好夢幻! 0 度酒精香檳雪糕梳打 $40(攤位檔號:32 ( Eagle Wine)
用意大利查馬釀造法釀製的 0 度酒精香檳,配上日本石門島雪鹽製造雪糕,香檳有好香蜜桃及白葡萄味,配上藍色外表雪鹽雪糕,連小朋友都食得,因為無酒精嘛!
 
Donelli 0 度酒精香檳(白葡萄味) $125/ 枝、$200/ 兩枝
 
檔口仲有台式古早加熱滷味,有大腸、豬耳、雞翼、豆乾等等。
 
 
11 一口砵仔糕 $15/ 半打(攤位檔號:19 名利食品有限公司)
 
現場見到排晒長籠嘅 一口砵仔糕,有 12 種口味,黃糖、白糖、豆沙、綠茶、芒果、榴槤、杞子桂花、士多啤梨、黑芝麻、芋頭、楊枝甘露、椰汁西米,令人花多眼亂!做成一口 size,食得滋味過癮!小記最喜歡杞子桂花,好清香。
 
12 過癮鵪春蛋串(攤位編號:39)
 
鵪春蛋串近來在市集好 hit,細細隻,賣相過癮!蛋邊燒得脆口,有原味($15)、黑松露味($20)和魚子醬味($20)
 
西貢廟會百周年慶典
日期:即日至 11 月 22 日
時間:1pm-10pm
地點:西貢天后關帝古廟 (西貢宜春街)
電話:2792 1240
 
文:Celia、攝:Ken
 
 

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more