Cute!公仔樣 Dip 醬雞蛋仔

發佈: 2016.11.27
文:

玩創新口味嘅雞蛋仔,已經滿足唔到吃貨無窮嘅好奇心!最近掃落將軍澳新都城中心,見到有間新開小店,叫「 Fullhouse Egglet 滿屋雞蛋仔」。主打 5 款口味雞蛋仔,有 原味、綠茶味、花生味、朱古力味蜜糖薑味,驟眼睇好普通;不過仔細睇,不得了!原來雞蛋仔係有公仔樣㗎!睇清楚!原來係一家人嚟!
(左至右)花生味雞蛋仔 $18、朱古力味雞蛋仔 $20、蜜糖薑味雞蛋仔 $20、原味雞蛋仔 $16、綠茶味雞蛋仔 $18
Fullhouse 老闆熱愛 warm family,所以餐廳有 design team 設計主題公仔,分別係一家四口爸爸 Thomas、媽媽 Tracy、囡囡 Tiffani 及囝囝 Tony,雞蛋仔亦以佢哋樣子做嘜頭,好 cute 呀!
蛋漿夠濃稠,倒模已見幾杰身。
雞蛋仔另一亮點係點秘製醬汁吃!同樣有 5 款口味: 拖肥、士多啤梨、朱古力、芒 蜜糖芥末醬,有選擇困難症可以問下店員意見,match 出最正口味。
蜜糖芥末、拖肥、朱古力、芒果及士多啤梨雞蛋仔醬,好多口味揀。
可加 $3 多一款餡料,有 肉鬆、紫菜絲、Oreo 餅、朱古力粒共 5 款,今次先試原味 + 彩虹糖,唔知好唔好味呢?
初初以為彩虹糖料好奇怪,原來加落原味雞蛋仔唔太差,本身蛋漿唔過甜,足料,彩虹糖酸咪咪。
朱古力味雞蛋仔最好賣,好多人喜歡加 Oreo 餅餡,朱古力控萬歲。
蜜糖薑味雞蛋仔用上薑粒混入蛋醬,最好點芒果醬食,酸甜醒胃又有薑味。
綠茶雞蛋仔建議加紫菜條及肉鬆餡料,再點朱古力醬食,味道好平衝。
介紹番舖頭來頭先,聽食店經理講,其實 Fullhouse Egglet 來自馬來西亞,本身是餐廳,有多間店,香港則有荃灣及黃埔兩間加盟店,主打西餐;而開業未夠一個月的將軍澳店則主力賣雞蛋仔,自創心思食譜,dip 醬食雞蛋仔就係力作。馬來西亞店跟住賣,仲創下日賣 500 底嘅紀錄㖭!犀利!
食店地方不大,只有 5 張細枱,主打外賣。
除咗雞蛋仔,仲有其他飽餅賣,例如 蛋撻($8),好有蛋香,用朱古力粉畫上 Tiffani 樣子。
流心朱古力菠蘿包($12),熱辣辣,不過稍欠流心效果,唔過甜食完唔膩。
小店 11 點後供應其他馬來亞粉麵、pizza、小食等,例如正宗馬拉風味的「新加坡海鮮喇沙湯米粉」($52),落了鮮蝦、青口、魚蛋,湯底椰香十足。
刻名小物+創意家品
老闆愛家,除了食店仲打造埋家品設計,小店除了餐廳部分,另僻一角作家品部,家品好多都充滿創意,仲有產品刻名服務。
木製曲曲筷子連布袋 3 件裝($88),可免費在木餐具上刻名(不超過 20 個字體),如想多刻字體另外加每字 $5。
風車量杯套裝($298),風車葉其實係量匙、風車身係量杯,擺埋一齊就係擺設,靚。
彩虹砧板($298),在砧板上切食材時,可將無用部分撥落角落凹位,或調轉作儲存之用,隨你喜歡,最緊要慳位。
Fullhouse Egglet 滿屋雞蛋仔
地址:將軍澳新都城中心一期 2 樓 254-255 號舖
電話:2715 0292
營業時間:9am-10pm
文:Celia、攝:Ki

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more