社企任食 即煎西冷厚切豬扒

發佈: 2016.11.25
文:


生生社企餐廳」開業半年有多,主打 fusion 西餐,每天午市座無虛席,最近仲跟着潮流新推抵食放題,90 分鐘任食每位 $188,時段由 5:30pm 至 10pm,每晚限定 38 位。

睇睇任點任食 menu,有 湯、沙律、麵包 3 款和前菜,仲有 3 款 吉列小食,放題重頭戲係扒類主菜!有豬、牛、雞同煎魚,滿足大家唔同口味。剔紙仔,任點任食。
餐廳空間好大,平日好多年輕人、學生都會嚟邊開餐邊開會傾 project。
一坐底,唔使落單住!侍應會端上前菜和一份牛扒 + 吉列大蝦。食記採訪當日嘅前菜係紅菜頭沙律、意大利菜湯配香草包,菜湯足料,沙律菜用本地貨,夠新鮮爽脆。
西冷牛扒 2cm 厚!
放題菜單其實係午市 menu 嘅精華,有齊最多人點嘅西冷牛扒同厚切豬扒。食記最鍾意西冷牛扒,用新西蘭西冷扒,肉質鬆軟,牛味香濃好 juicy,重點係目測有成 2 cm 厚!啖啖肉,食肉獸表示食得好開心!
厚切豬扒 夠腍滑!
另一推介係厚切豬扒,分量同 Lunch set 一樣,點厚法?目測有 3 cm 厚㗎!肉質一啲都唔韌,原來師傅用咗秘方炮製豬扒,所以厚切豬扒都煮得軟腍滑,肉味又濃郁,好食!
牛扒有薄切
唔鍾意厚切,仲有特製醬汁薄牛扒選擇,黑椒微微帶辣;唔食牛又有香茅雞扒同香煎龍脷魚。
吉列蝦餅 有芝士餡!
小食有吉列蝦餅、吉列大蝦同吉列芝士豬扒 3 款,吉列蝦餅原來有芝士餡,驚喜!不過就略嫌吉列外層較厚。
流心芝士蛋糕 $29
呢個放題唔包飲品和甜品,但可以半價 $29 享用。流心芝士蛋糕好吸引,切開一半就見流心芝士餡,伴 movenpick 呍呢嗱雪糕食,正!
「生生社企餐廳」係由「生生慈善基金」籌資開設,背後有個理念,就係希望培育邊青和更生人士作餐飲業人才,等佢哋學得一門手藝,從而提高自信。
小結:
扒類任食唔係新鮮事,但社企做任食很少見,去幫襯,感覺別具意義。坊間任食通常只能揀一款,好少有齊豬牛雞魚咁多選擇,餐湯前菜仲有小食任食,餐廳真係揼本。食物質素當然不能與高級扒房同日而語,但用料和分量不俗,豬扒牛扒統統厚切,即點即煎,做得有誠意。菜式分量同午市一樣,但午市扒餐賣 $128 一客,如今 $188 任吃,真心抵。一個人無可能 KO 所有扒,不如搵多幾個 FRD 子去開心 share。
生生社企餐廳
地址︰灣仔太原街 33 號囍匯 5 座 1 樓(餐廳入口設於交加街)
電話︰3709 6878
營業時間︰星期一至五 11:30am-2:30pm; 6pm-10pm,星期六及日 5pm-10pm
文︰louise、攝︰ jay

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more