$500 有找!平食聖誕大餐提案

發佈: 2016.12.01
文:

提早過聖誕有着數│Cull'N Pistol 
蘇豪東嘅 Cull'N Pistol 主打美國東岸海鮮菜,喺全世界搜羅海鮮食材入饌。餐廳門口有半露天坐位,感覺夠晒 chill!
好多朋友仔都唔想聖誕嗰日同人迫,餐廳由 12 月 10 日開始就有聖誕餐,一直供應到 12 月 24 日!價錢真係錫住你銀包,$308/ 位(另收加一)!聖誕餐有齊頭盤、主菜和甜點 3 道菜式。頭盤新英倫馬賽魚湯,配以蜆、青口及芝士多士,海鮮味甜。
人少少又想食火雞應節,主菜 煙肉配火雞滿足到你啦!火雞肉內釀了栗子及蘋果,外層再卷上香脆煙肉,淋上紅莓汁和砵酒汁,甘香得來充滿果味。最後以糖煮核桃、肉桂、蜜糖吉士點綴,及呍呢嗱雪糕嘅聖誕布丁做甜品,都算豐富。
餐廳於 12 月 24 日晚推出平安夜套餐,$488/ 位(另收加一)。頭盤可揀 烤雅枝竹沙律、海鮮馬賽魚湯香煎帶子
主菜有 虎蝦墨汁意粉、炭燒波士頓龍蝦、烤澳洲羊架。愛牛扒嘅必揀 10 安士烤愛爾蘭肉眼扒,配蘆筍、蜜糖紅菜頭和紅酒汁,吸引!平安夜套餐更包甜品及紅酒一杯㖭!
Cull'N Pistol
地址:西灣河鯉景灣太康街 55 號 A 期 GA1-3 號舖
電話:2513 0199
供應時間:星期六、日及公眾假期 11am-3pm

$338 韓風炸雞聖誕│Pizza Maru
聖誕節一定要食西餐?哈韓族可以食炸雞過節!銅鑼灣希慎嘅 Pizza Maru,推出韓風聖誕餐。餐廳裝修到好colourful,K-pop 無限 loop,氣氛夠熱鬧!
講返聖誕餐,餐廳會於 12 月 24 至 25 及 31 日晚上供應,每位 $338。提提你,聖誕餐兩位起,想過 lonely Christmas 嘅你就無份啦!先嚟 Chandon Brut NV 氣酒,再送上包括 蜜糖柚子花園沙律、蜜糖忌廉炸薯條、芝士脆包卡邦尼年糕嘅頭盤,清新開胃。
主菜可揀一款 韓式薄餅、炸雞(6 件)香辣海蝦玫瑰意粉。推介芝士迷試吓 聖誕限定版火雞盛會芝加哥薄餅(另加 $50)。薄餅本身以 3 款芝士製作,再配搭應節火雞,惹味到暈!
必試蜂蜜蒜泥秘製炸雞,炸雞沾滿甜香蜂蜜及辛辣蒜泥,好滋味!甜品有法國空運嘅歌劇朱古力蛋糕。套餐仲包埋飲品,可於 濟州橙汁、番石柳果汁、西柚冰樂、玫瑰茉莉花綠茶玄米綠茶自選一款。
Pizza Maru
地址:銅鑼灣軒尼詩道 500 號希慎廣場 13 樓 1302 舖
電話:2318 1012
營業時間:11:30am-11pm
$388 開心 share 肉食派對│The Chop House 
位於鬧市旺區嘅尖沙咀,一樣有平價聖誕餐!好似尖沙咀尖沙咀美麗華商場嘅 The Chop House,設有露台位,望住尖沙咀夜景歎晚餐,好爽!
尖沙咀店嘅聖誕餐,由 12 月 24 日至 26 日期間於晚餐時段供應。聖誕餐有 5 道菜式,每位 $388,另收加一。頭盤 聖誕古巴卷以聖誕火雞為靈感,釀入豬肉、鵝肝及栗子,並配上葡萄乾紅酒汁,味道層次十足。另一道頭盤 帕爾瑪火腿及無花果沙律,用咗 36 個月帕爾瑪風乾火腿,伴意大利無花果、沙律菜、菲達芝士及紅莓汁,甘鹹中又好 fresh!
主菜前仲有 海鮮番茄濃湯,畀你清清口腔!主菜有勁豐富嘅 聖誕烤肉拼盤,分別有釀入栗子、雞肝、葡萄乾、砵酒及香草,慢煮 45 分鐘後再烤香嘅烤法國火雞卷、烤澳洲羊扒及蜜汁烤火腿。
甜品都都可以食到 3 款!要 warm 嘅有65% 濃度朱古力製作嘅暖朱古力蛋糕、帶淡淡酒香嘅聖誕布甸及酸甜嘅檸檬及青檸批,另配呍呢嗱雪糕、蛋白脆餅及紅莓馬卡龍。
The Chop House
地址:尖沙咀彌敦道132號美麗華商場 3 樓 3013C 舖
電話:2295 3200
營業時間:12nn-1am
註:聖誕餐每位 $388,兩位起
文:jessie 圖:有關機構

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more