韓國到着!安東燉雞 + 勁拉芝年糕

發佈: 2016.12.02
文:

呢間韓國過江龍叫「鳳雛」;喺韓國主打安東燉雞,唔同近年大熱嘅炸雞,安東燉雞係汁煮雞,配蔬菜和冬粉食,味道濃香,個人認為冬天食最啱!講返鳳雛,來頭不少,喺明洞、弘大、東大門、釜山,甚至中國同台灣都有分店。今年佢嘅版圖終於擴展到香港啦!
裝潢設計以韓國店為藍本,以黑色和木色為主調,窗旁係搶手位!
鳳雛首次抵港,裝潢風格、燉雞製法都跟足韓國本店,韓籍主廚有 10 多年炮製韓食經驗,亦於韓國店受訓 2 個月,將韓國正宗味道帶嚟到香港。
韓國店只賣安東燉雞,可能見香港人心多,香港新店有更多菜式選擇,包括 炸雞、炒年糕、紫菜包等,多達 32 款韓食,開心死!
鳳雛燉雞 $138 (小)、$258(大)
正宗的燉雞是辣的,這裏可揀大中小辣;size 也分大小,大盤的用原隻本地雞製,雞以韓國燒酒浸泡過夜,配埋蘿蔔薯仔洋葱,加入韓國本店秘製醬汁煮燉,雞肉嫩滑入味,醬汁杰身濃香,鹹味中滲出蔬菜甜香;別錯過,精華一定喺鋪底嘅冬粉!韓國冬粉晶瑩煙韌,吸晒汁,但食落唔會太鹹,讚!配埋個凍嘅白蘿蔔湯,解辣最啱。
無法停手的芝士年糕 $90
菜如其名!用泡菜年糕做 base,上面鋪上 Mozzarella 芝士,新鮮熱辣時「拉芝」捲住年糕同食,芝士質感煙韌香滑仲帶點辣,好「芝」味又刺激!
迷你紫菜包飯 $30
紫菜飯卷有蔬菜、醬牛肉同芝士 3 款,雖是 mini size,不過都好足料,蘿蔔絲、生菜、酸菜、醬牛肉質爆晒!佔飯卷嘅 2/3!入口百味紛陳,細細件零舍滋味!
菜包韓式辣炒豬肉 $80
以為係韓燒嗰種豬肉生菜包,原來係用竹籤串起辣醬炒豬肉、生菜、紫椰菜,配 3 件紫菜飯糰吃,食法好得意!豬肉惹味帶辣,夾埋爽脆生菜食,無咁熱氣。
無骨炸雞炒年糕 $148
一半炸雞一半年糕,一次過滿足兩個願望。炸雞炸得香脆,肉質不粗糙兼有肉汁,不過雞塊偏細。
鐵板韓式拌飯 $80
韓式拌飯一上枱就聞到香噴噴,用保暖石鍋盛住紅蘿蔔、牛肉、菠菜,加隻太陽蛋,賣相吸引。
鳳雛燉雞
地址︰旺角彌敦道 726 號 10 樓
營業時間︰試業期間 5pm-10pm
電話:27050022
文:Louise 攝:Jay

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more