一泊兩食 飛太空食聖誕 Buffet

發佈: 2016.12.09
文:

汀九位處幽靜,酒店對住青馬橋海景,可以擺脫繁囂過聖誕。
 
酒店環境不錯㗎,對住汀九海景,住宿計劃就包咗園景套房一晚,平安夜或聖誕節來可以先去迪士尼或挪亞方舟玩餐飽,跟住食蒲飛;酒店仲有 7 款特色主題房,最特別是「探索太空」主題房,裏面天文望遠鏡同 Ogawa 按摩椅,長夜漫漫,可以揼住骨欣賞馬灣一帶星空;「集體回憶」房最好玩,除了布置懷舊,仲有釣魚機、挑竹籤等小遊戲,連牆都變咗巨型康樂棋。其他主題房仲有十足十 game room 的「足球狂熱」、榻榻米房「東瀛魅力」、「奇趣木馬」、「海洋世界」及「綠野森林」。
 
鮮人蔘蒸鱸魚柳配清酒牛油汁
以新鮮人蔘、清酒及牛油烹調,配鱸魚,清清哋又有人蔘香。
 
唔埋你參唔參加住宿計劃,一樣可以嚟吃蒲飛,聖誕蒲飛加咗碼,加咗好多養生主題菜式,好似近年大熱的藜麥,用來做沙律同甜品;仲有素人都吃得嘅桃膠,今次用來做椰汁牛奶糕。當然唔少得中國人傳統智慧的養生名物──花膠同燕窩,今次有少許破格,花膠配意粉,燕窩做 donut,中西合壁,又幾得意,訂蒲飛仲送紅棗元肉椰汁花膠燕窩一盅,全部回本度都高。
 
砵酒圓肉烤鴨胸
中西 fusion,西式的砵酒烤鴨加入圓肉作材料,據講可補血安神。
 
桃脂藜麥椰汁牛奶糕
椰汁牛奶糕裏有藜麥,加上現今大熱的桃膠,健康香甜。
 
場內仲有即席製作的刺身丼飯 counter,平日的北菇燴花膠、波士頓龍蝦、阿拉斯加長蟹腳、烤蠔等繼續放送,睇睇價錢,淨係自助晚餐已佔住宿計劃一半價錢,包房包埋第二朝 buffet 早餐,都算係咁啦。
 
抵玩住宿計劃
一連幾日聖誕假,唔想舟車勞頓,可選包埋蒲飛的住宿計劃。「冬日聖誕住宿計劃」12 月 16 日開始,情侶價 $1,599 起、親子價 $1,899 起;12 月 24 及 25 日設「甜蜜聖誕住宿計劃」,情侶價為 $2,299、親子價 $2,699,價錢包括山景客房 1 晚、自助早餐、自助晚餐、Ogawa $200 現金券、酒店穿梭巴士車票。加錢仲可以升級以下主題房,12 月 14 日前預訂及付全費可免費升級至海景房,先到先得;登記成為會員然後訂房,可減 $100。
 
「探索太空」每晚加 $350 / $450
房內有天文望遠鏡、地球儀及按摩椅,配上魅幻藍色的燈光好有太空漫遊感覺。
 
「集體回憶」每晚加 $350 / $450
80 年代香港舊居庭布置,房內不止有放大版的康樂棋盤,仲放了不少兒時玩意畀大家玩。
 
帝景軒
地址:荃灣汀九青山公路 353 號帝景酒店•電話:3716 2898(餐飲)、3716 2888(訂房)
供應時間:首輪 6pm- 8pm、8:30pm-10:30pm
收費:現金及信用卡,設加一
交通:於港鐵荃灣站轉乘酒店穿梭巴士或 96M、96C 或 96小巴前往
泊車:酒店停車場或汀九設咪錶位
平均消費:午巿 $250、晚巿 $500
價錢:12 月 24 及 25 日 成人 $588 位、小童 $388 位
備註:12 月 18 日前預訂節日自助餐及付全費可享 8 折
 
文:Rudolph 攝:Sky
 
 

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more