冬甩控福音!印尼冬甩名店初着陸

發佈: 2016.12.13
文:

相信各位冬甩控都同我一樣,經常呻香港嘅冬甩無咩選擇。最近終於有嚟自印尼嘅大型冬甩店 J.Co Donuts & Coffee 登陸灣仔喇!講下 Background 先,呢間源自印尼嘅 J.Co Donuts & Coffee 創立已超過 10 年,喺當地有成 200 間分店,新加坡、菲律賓、馬來西亞等地都可以見到佢嘅蹤影,來頭唔少。今次以特許經營嘅形式嚟香港,喺灣仔軒尼詩道插旗,堂食約 30 個座位,裝潢由印尼設計師操刀,走工業風,型格又輕鬆悠閒。
裝潢由印尼設計師操刀,走工業風,約有 30 個座位,氣氛悠閒舒適。
總店有 33 款口味冬甩,其中 22 款帶咗嚟香港,所有口味的冬甩一律賣 $15/ 件、$88/6 件、$148/12 件、$258/24 件,買得多平得多!為咗保持味道同質感都正宗,唔只當中 8 成嘅食材來自印尼、製法跟足當地,店內有 4 位職員更喺舖頭開業前去印尼店 train 咗成個月。冬甩每日喺鋪頭新鮮製造,麵團攪勻後要經過兩個幾鐘發酵先會少量地炸,上架後只會keep 4 個鐘,確保新鮮。食落口感比一般美式冬甩輕盈 fluffy,亦唔會一味死甜。
Alcapone $15
印尼最受歡迎嘅口味,外層 coat 滿比利時白朱古力及烤杏仁片,香甜鬆軟,最啱配招牌的意大利泡沫咖啡。
Mr. Green Tea $15
香港人大愛嘅綠茶口味呢度都有供應,綠茶味朱古力 coating 味道有點似韓國好出名嗰款抹茶醬。
Avocado Di Caprio $15
外層是牛油果味朱古力,裏面唧滿加入牛油果粉調製嘅忌廉,食落帶濃濃嘅牛油果香。
Berry Spears $15/ 件
外層 coat 滿士多啤梨果醬,裏面係滿滿嘅忌廉芝士餡,酸咪咪咪道啱啱中和到 cream cheese 嘅膩感。
心大心細決定唔到想食咩口味嘅話不妨試吓呢度嘅迷你版冬甩($98/24件),可以一次過試多幾款口味,造型仲好 cute 添!迷你版冬甩全部都有餡,分別係朱古力餡同忌廉。
除咗冬甩,香港店同印尼店一樣有供應 frozen yogurt、咖啡、Frappe 之類飲品,至於當地有售嘅 cronut,就會遲少少先同大家見面。為咗迎合香港人口味,舖頭仲會有少量三文治供應㖭。冬甩店今個月逄 weekend 都會派 100 個冬甩,想免費試食,要快!
Oreo Cheesecake Frappe $38 (12oz)、$41 (16 oz)、 $44 (20oz)
印尼店最受歡迎嘅飲品之一,由 Oreo、cream cheese、牛奶、朱古力 base 調成,口感幼滑,芝士味香濃。
J.cool yogurt $38(Couple, 2 toppings)
用印尼入口嘅 premix 加本地嘅 yogurt 同 skim milk 做,可加水果、曲奇等 topping,味道清酸少甜。
J.CO DONUTS & COFFEE
地址:灣仔軒尼斯道 55 號地舖
電話:6982 8282
營業時間:7:30am-9pm
文:amy 攝:chow

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more