正在閱讀
Title
$20 開心價豬雜湯 客家撈麵

$20 開心價豬雜湯 客家撈麵

發佈: 2016.12.16

有日慕名而來,卻發現它關門大吉,嚇死為食寶寶。原來,就係因為生意太好,搬咗去大坑渠、舊 B仔旁,設埋堂食位,千里迢迢入到嚟,老虎蟹即刻轉陣過去吃。

網友話呢度的客家撈麵豬雜湯豬肉丸湯掂到不得了。點知真係一口上癮。撈麵係頭號至愛,個麵爽‧實‧香,仲有好惹味嘅脆口辣菜脯,加埋爆辣的辣椒醬,3 分鐘我擦晒,仲要追加多碗添,中邪咁追住食。找正在吃午飯嘅老闆娘加單,她笑着說:「好唔好味?我朝朝 6am 就起身準備湯呀、洗豬雜,生麵米粉辣椒醬胡椒粉都係自己做㗎。我哋全部都係手工嘢,想賣多碗都無啦,晏啲嚟會賣晒㗎!係咪加多碗麵?」

同 nice nice 嘅老闆娘寧小姐傾開,開店係因為喺元朗食唔到客家街頭嘢,於是就落手自己做。超級亮點係生麵,她在工場用麵機加手擀,因為隔天做,不用加鹼水保存,食落有天然蛋香,煙韌有 Q 感。辣醬同胡椒食我有衝動做賊偷走它們,全部都係老闆娘自製,前者爆辣唔死鹹仲有辣椒鮮香;後者仲勁,找朋友由海南送來材料自家炒,胡椒味正過泰國名物源順號胡椒粉,加落豬雜湯度,胡椒香噴噴超吊味。最開心係咩呀?$20 一碗,價位時光倒流去 90s 喎。食晒撈麵同豬雜湯,價錢仲平過我喺巿區搭入嚟嘅車費。不過,專登由巿區入嚟元朗食遊、想試多幾間好西嘅朋友,請幫幫手,唔好四個人入嚟只嗌一碗霸住張枱咁 cheap 兜,淺嘗無問題,買外賣就好,始終小店利錢不高,追租有壓力㗎。


客家特色撈麵 單點 $20、套餐 $35(配豬肉丸湯 / 豬雜湯)

客家麵食,配料有自家炒的惹味肉醬及青葱,亮點仲有老闆娘製的菜脯,菜脯無鹽醃千年的死鹹,爽脆少辣,撈勻肉醬,豬肉與豬油掛在麵條上,吃來煙煙韌韌好惹味,眨下眼就 K.O. 晒碗麵,高推。


豬雜枸杞湯 單點 $20、套餐 $35(配秘製肉醬撈麵)

豬雜是新鮮貨,每日由附近街巿肉枱取來的,有豬膶、粉腸、豬腰等,湯底是豬骨湯,非常鮮甜,內臟無腥味也沒有汆到無晒味,粉腸又脆又粉最正,豬腰也無餲味。一定要加胡椒粉,胡椒味鮮活辛香,是店家自製的。


豬肉丸益母草湯 單點 $20、套餐 $35(配秘製肉醬撈麵)

豬肉丸自製,實淨裏面有肉汁,益母草用湯灼後,口感像 BB 菠菜,湯底鮮甜唔膩。


辣椒醬

連它也是自己用辣椒炒的,不鹹反而有指天椒的新鮮味道,蒜香十足,舀一粒黃豆大小的醬來撈麵吃,嘴仔即時着火,但忍唔住追住吃。


客家酸菜燜豬肉 $30

豬腩肉肥瘦相間,燜得透,皮與肥膏的膠質都溶晒出嚟,一夾起,皮與肉即刻分離,好軟好嫩,食落帶少少甜,一定要連埋墊底的客家酸菜吃,酸菜口感像雪菜,微酸與豬肉好夾。


老闆娘寧小姐好勤力,堅持店內 95% 用料都自製。


麵條是老闆娘隔日在工場做的,原材料是麵粉和雞蛋,一滴鹼水都不加,食到新鮮麵香味,麵質彈實,頭好,好飽肚。


生麵條麵粉及雞蛋用到足,煮好就見到條條分明,帶淡淡雞蛋黃色。


舖頭很小,只有 10 來個座位,經常爆滿,仲試過下午 4pm 所有食物已售罄。

食葩
地址:元朗裕榮徑 11號洋樓 7號地舖(舊 B仔旁)
電話:6353 9586
營業時間:10am - 8pm,星期日休息

原文摘自 U Magazine ISSUE 577

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【U Lifestyle App限定】送iPad mini (Wi-Fi版)!↓

立即入App答問題 人氣獎品、優惠折扣隨時等您攞!

發表食譜

免費登記成為U Lifestyle 會員
即時接收最新資訊並盡享獨家優惠

more