再有日本築地過江龍嚟香港開店喇！築地場內直營鮨店うまい鮨勘，今日（12月15日）起於尖沙咀海港城正式試業。餐廳以淺木色為主，設有卡座及可以見到師傅製作壽司嘅吧枱，好傳統嘅壽司店格局。
來自日本築地，唔似喺日本中下價錢超抵食，定價比當地高啲啲。但初嚟香港報到，都以筍價做見面禮。由即日日起至 12 月 22 日，一連 7 日每日推出一款指定招牌食品，首 10 客有 1 折價優惠。之後嘅 100 客都可以有 5 折優惠㗎！好開心！
極上壽司盛 $300
開業第一日有招牌嘅極上壽司盛，不過開門第一 round 已經賣晒 10 客，到 2:30pm 左右連半價優惠都賣晒！呢個極上壽司盛有齊鮪魚腩、海膽軍艦、左口魚、間八、三文魚籽軍艦、新鮮帶子、油甘、加拿大牡丹蝦、三文魚子軍艦及加拿大海膽軍艦，好大堆頭！
極上鮪魚丼 $350
今日食唔到？快啲 mark 實 Happy Friday 嘅優惠！呢個極上鮪魚丼隔住個 mon 睇都聞到陣魚油香。店內嘅鮪魚由長崎縣產，差不多每兩日由日本直送到店解體。丼飯集大鮪魚腩、中鮪魚腩、赤身，大大片嘅鮪魚刺身上，仲有香葱鮪魚蓉，滿口油脂香氣，令人尖叫！
【日菜狂迷】
上網 Book 要快！灣仔築地聽日試業
築地壽司盛 $488
最吸引要數星期日出場嘅築地壽司盛！12 件嘅壽司，有 9 成都是季節性刺身，包括北海道牡丹蝦、金目鯛、間八、針魚、中拖羅、大拖羅等，當中有嘅火燒赤睦是必試！經過火炙後逼出魚香味，淨係秋冬先有得食咋！
畀定貼士你，其他優惠包括 12 月 19 日嘅極上鮨勘丼、12 月 20 日嘅鮪魚壽司盛（10件），及 12 月21 日嘅北海丼，呢個丼飯有海膽、牡丹蝦、松葉蟹肉、帆立貝、油甘等 9 款刺身，勁吸引！
極上香葱鮪魚腩蓉特盛壽司 $50
嘩！巨型壽司好吸睛呀！呢件巨無霸鮪魚腩蓉壽司，足足 300g 重，有 6 件普通壽司嘅分量。鮪魚腩蓉用咗鮪魚的魚骨位置嘅中落製作，魚肉口感嫩滑肥美，入口鬆化即融。
三文魚親子特盛壽司 $50
仲有呢個三文魚親子特盛壽司，包住壽司飯嘅係油脂豐腴嘅三文魚腩。值得一提是壽司飯，選用山形縣久保田米。醋味及酸味較淡，飯味帶甜，突顯刺身嘅鮮甜。
【人氣到着】
世界第 2 好味 日本雪糕蜜瓜包登陸！
甲羅燒 $188/ 份
日本店主打刺身和壽司，嚟到香港增加咗沙律及熟食選擇。甲羅燒係香港店獨有，將松葉蟹肉與蟹味噌，放於蟹蓋內再燒，蟹膏甘香。
炸粟米餅 $30
將新潟粟米蘸滿天婦羅粉漿炸，炸時用筷子不停篤，令熱力滲入粟米餅內，炸出嚟更加香脆。
北海道海膽手卷 $120
手卷嘅形狀同坊間嘅雪糕筒狀好大分別，圓形筒狀嘅手卷入面鋪滿刺身等食材，每一啖都食到海膽，感覺好滿足！
うまい鮨勘
地址：尖沙咀海港城海運大廈地下 OTG04
電話：2115 9956
營業時間：12nn-10pm
文：Jessie 攝：Brian
【聖誕去邊】
任食糖果屋！現身赤柱聖誕市集
【美食激鬥】
尖沙咀 3 大 Souffle 班戟對決！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
