中式饅頭 x 西式漢堡包，究竟係邊個將呢兩樣大纜都扯唔埋嘅食物，放埋一齊仲要拎出街賣？原來係大隻仔趙勁皓（King） 拉埋老友陳柏宇再次合作，於旺角中心開設饅頭漢堡專門店 The Beef and Leaf！小店喺 12 月 14 日正式開幕，兩位話事人當然現身招呼客人，King 嘅女朋友盧頌之（DaDa）都落場幫手打點。小店一眼望晒，廚房佔大半位置，另一邊則設長枱畀客人立食。King 話計劃月尾喺葵涌廣場開多間，於農曆新年前開多 4 間分店，滿腹大計！
中西合璧嘅饅頭漢堡包，咁有創意嘅食法，源自一班朋友於 King 嘅「北京老家」食飯，咬住嚿饅頭之際諗到；用吸汁嘅鰻頭，夾住唔同食材一定好好食，於是慢慢改良成夾住牛肉漢堡及沙律菜嘅饅頭漢堡包。牛肉漢堡每塊足 4 安士，選用澳洲牛角肩位置加洋葱、蒜、香草等，每日以人手打製，牛肉漢堡扒唔會留過夜，避免因長時間冷藏而變乾；食落肉味濃郁，肉汁豐富，咬開唔會散開變肉粒，有水準！
【旺中情報】
旺中 vs 葵廣 4 大海膽手卷 邊間最正？
牛葉流心半熟蛋饅頭 $46
身為健身教練嘅 King，又會唔會將健康嘅 concept 放入饅頭漢堡內？無！小店所有出品都係邪惡底！呢個半熟蛋饅頭，大廚先將煮好嘅流入蛋，放入漢堡扒內，配以大量半融芝士及沙律菜。大啖一咬即唧出蛋黃汁，加埋牛肉嘅肉汁及軟滑鹹香芝士，勁惹味！
牛葉雙重芝士饅頭 $48
邪惡軸心又點止一個？仲有雙重芝士饅頭，收到 order 時大廚會將車打、水牛及 mozzarella cheese 釀入牛肉漢堡內再煎。食時先嘗到牛肉香味，再咬到中間就可以拉出勁長拉絲，芝士鹹香又能令牛肉漢堡扒更軟滑。
牛葉法式野菌饅頭 $42
大廚玩埋法式元素！法式野菌汁以牛肝菌及 4 款不同菇菌煮成，菌香四溢！饅頭漢堡仲有貼心位，大廚將鰻頭蒸至軟腍後再烘，咬落軟熟得嚟又帶點脆口。
【最新到着】
築地場內壽司店到着！1 折食海鮮丼
牛葉古法咕嚕饅頭 $38
中式代表不得不提咕嚕醬汁！咕嚕汁色澤唔係紅到變螢光色，因為大廚用咗全天然食材調製。咕嚕汁是大廚於雲南學藝時學識，以五柳、醋等調製，酸味柔和不嗆。
牛葉芒芒饅頭 $38
再 fresh 啲可以揀芒果汁饅頭！淋於牛肉漢堡面嘅係以新鮮芒果打成嘅醬汁，芒果酸甜及果香可中和牛肉嘅油膩。
牛葉船 $68
牛魔王唔想食饅頭？得！呢條牛葉船，載住 8 安士澳洲西冷扒。煎至 5 成熟再灑啲烤蒜粒，好香口。每份牛葉船可於
芝士、磨菇、墨西哥辣汁、芒果、沙嗲、咕嚕等揀兩款醬汁。
牛葉三青 $28
小店仲有 3 款飲品，呢杯以青瓜、青檸及薄荷葉加梳打即製，味道清新。老闆娘 DaDa 話，仲可以減輕浮腫兼有抗氧化功效！
（前）牛葉兩紅 $28、（後）牛葉一白 $28
紅色嘅係以洛神花及山渣煮成，味道酸酸咪咪，最啱消滯。另一杯牛葉一白都係女孩子恩物，有生、熟薏米加桂花及梳打，有助美白去水腫。
The Beef and Leaf
地址：旺角彌敦道 688 號旺角中心 1 期 1 樓 F87A 舖
電話：從缺
營業時間：12nn-10pm
文：Jessie 攝：Nova
【美食本營】
一站式！太古美食 x 生活市集
【韓風來襲】
即將登陸！韓國人氣蜂巢果汁
歡迎你 like 我哋 U Food Facebook Page / U Food Instagram ，取得我哋更新更快嘅資訊！
