富豪飯堂 $1,200 冬瓜盅
大家都知灣仔福臨門係富豪飯堂，一個 8 人分量的冬瓜盅索價一千二百元，平民百姓如我總得找個原因，去說服自己荷包大解放。係，我知，這冬瓜盅跟足傳統做法，但坊間不獨福臨門保留傳統。直至我深入餐廳的廚房，將製作冬瓜盅的材料逐一揭破，再從行政總廚劉照成師傅口中套料，終於知道它矜貴過人的關鍵！
聽見價錢以為用了罕有貴價食材，其實它反璞歸真，用的都是最常見的田雞肉、蟹肉、燒鴨、蓮子、夜香花等冬瓜盅材料，但講究在於所有材料都是每日鮮，一整天要用的食材上午送到，立即做好預備工夫，劏的劏，斬的斬，下午想找隻蟹或搵隻燒鵝影相？Sorry，用晒喇！因為這裏沒有食材留過夜，比任何一間大酒店講究得多，以下是我目擊預備材料的過程，也是貴得有理的證據，這一千二百大元，我畀得心服口服。
福臨門
地址：灣仔莊士敦道 35 - 45 號利文樓地下 3 號舖
電話 : 2866 0663
首推私房 野菌盅
迷你冬瓜盅小巧的分量剛好，user-friendly 之餘價錢也貼近民情，但連鎖快餐店的製作實在劣質，其生存意義只為證實「圖片只供參考」。要吃迷你版，私房菜紅廚的出品就十分對辦，今年是餐廳首次推出迷你冬瓜盅，因為吳師傅在餐廳旁的蔬果店找到荷蘭品種的小冬瓜，size 恰到好處。小冬瓜切半去瓤後空間竟也不少，夠放入多件鮮拆蟹肉，還有羊肚菌，用的是新鮮菌，來貨 $500 斤，雖然每人只得一至兩顆，但鮮濃味已經滿瀉。
紅廚
地址：元朗錦田祠堂村地段 390 至 400 紅磚屋 61 號舖
電話 : 9094 0584
佛跳牆 加冬瓜盅
此盅是「舊瓶新酒」，外表依然是那在盛夏綻放的冬瓜，裏面卻是佛跳牆用的名貴材料。中菜廳粵在冬天供應佛跳牆，然而濃稠湯底令人熱上加熱，所以師傅改以冬瓜盅形式，不減名貴度又好啱夏天食。看瓜盅小小的，以為材料有限，數一數，有鮑魚、花膠、海參、魚翅、瑤柱、鹿筋、火腿及冬菇，有齊鮑參翅肚童叟無欺，每個只賣 $228，還足夠二人享用。而且每款海味料都經過兩三日浸發蒸煮，預備工夫做到足，這個價錢，好抵食呀！
粵
地址：北角城市花園道 9 號城市花園酒店 1 樓
電話 : 2806 4918
(原文摘自《U Magazine》文：黃茵、圖：Ken、Suki、Kwan Yiu Cheung、Nova、May、Willis、Fai)
↓【請您試食】一粥麵「麻椒醬油雞」及「去骨海南雞」套餐！↓
↓香濃嫩滑︱辣中帶麻︱立即免費換領↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
