佐敦 歎塔門鱆紅
水上人老闆喜哥對海產有要求，嫌供應商的魚類唔夠生猛同鮮甜，一於取來塔門的頭手海鮮到店內做粥、打邊爐和私房小炒，最驚喜是食到貴價的鱆紅魚及全港最厚的大尾魷。
唔好以為鱆紅魚係日本獨有，其實塔門一帶有港產的，塔門水清、微生物多，魚又肥又夠濃味，加上灣內水流急，鱆紅運動量高，肉質實淨唔會散，又無泥味。香港不少酒店日本料理及火鍋店都用來刺身，做得刺身都知牠質素有多高。還有手釣的西貢名產大尾魷及海火箭魷魚，魷魚間間食店都有，但絕對沒有喜爸喜媽每朝摸黑熬船出海手釣般肥美，當造的大尾魷足足有 2 斤重，還有特長的海火箭魷魚，厚身鮮味。
菜式有「水上人」的家常味，粥底跟足漁民做法以大地魚加珍珠米煲、魚湯加了蝦和大地魚熬，口味同市區非常 Commercial 的海鮮飯店不同。
靚粥工房
地址：佐敦上海街 24 號 1A 號舖
電話：2377 3813
鴨脷洲 海鮮私房菜
這間隱藏在黃竹坑工業大廈的私房菜唔多人知，但少數識途老饕就知道這裏有好嘢食，朝朝從海鮮的集散地鴨脷洲街市買來游水海鮮做菜。從漁市場直接入貨的鴨脷洲街市，海鮮更齊更生猛。買手關先生雖不是飲食業出身，但愛吃海魚，積累不少經驗又與魚檔混熟，天天風雨不改到鴨脷洲街市買貨，見時令才選，近期最愛買香港仔的特產海斑仔、懵仔魚、黃腳立與石鯧，也愛用鴨脷洲一帶漁民自己用鹽醃製的鹹鮮魚；街市以外，還會到海旁找一些個體戶艇家買他們從海捕捉來的沙鯭、泥鯭或油錐，總之不時不吃。
交到大廚梅姐手上，海鮮不少都只用海鹽調味，自家熬魚湯、鮑汁等為海鮮入味，口味是無味精住家風，但做法又有高級粵菜的精細，好像鮑魚自家炆，再用回鮑汁炆米粉；懵仔魚則用滬菜燻魚的方法以玫瑰及片糖燻；其他菜式如豉油雞、燉冬瓜炆豬肉、炆牛尾都做得有心機兼用新鮮材料，價錢又不算貴。
Vie Club
地址：黃竹坑業發街 12 號松柏工業大廈 4 樓 A1 室
電話：3692 5534
油麻地 食果洲奇形螺
其實海下灣及印洲塘海岸公園一帶都有唔少靚螺出產，正貨有蜘蛛螺、天使蚌、玉螺、長尾螺、珍珠螺、塔螺、及虎螺等，連天價的響螺、大眼螺、鬼爪螺及角螺都有，鮮甜度拍得住北海道來的天價海螺，不過海螺要挖，產量不多，漁家挖埋都係自家食用。
好彩這間火鍋店有心，老闆阿 Liao 本身是潛水高手，每星期兩次潛入相思灣珊瑚礁及果洲群島一帶海底挖螺，再直遞返油麻地舖頭給食客打邊爐。火鍋料得，仲要有好湯底，這裏的皇牌一定是用荷包蟹、三點蟹及麵包蟹加番茄熬出來的蟹皇湯，加了有「天然蟹味精」之稱的荷包蟹做味引，湯底蟹味強勁到爆燈。配上極肥兼有膏的斑馬瀨尿蝦、鬼蝦、蟶子皇、琵琶蝦及嘉菲蟹等來路的游水海鮮，邊爐打到尾海鮮味濃縮了，加飯做蟹湯泡飯，鮮到令你牙骹發軟！
廣東飯莊（火鍋專門店）
地址：油麻地廣東道 872 號
電話：2666 6683
(原文摘自《U Magazine》文：sieg、圖：May、Kwan、Kam、Kee、Sky、Ken)
↓【免費送🎁】微熱山丘全新造型香蕉窩夫餅乾禮盒100盒！↓
↓ 進駐香港十週年大贈送│送埋香港獨家限量版布袋～↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
