上位小炒王

特首落區燒鵝王

開業不過 3 個月，就差不多日日爆場，最巴閉係早前梁振英落區了解民情，都專程叫班區議員訂位試這裏的燒鵝同小炒，口碑吹到特首耳邊，係唔係勁先？小炒店前身是 30 多年的小炒老店，電視藝人羅貫峰跟中學同學大眼接手，後生老闆新思維，將店子 180 度變身，專攻海鮮及燒鵝。

餐廳是少數自設燒味爐的小炒店，都是因為請到有料到的燒味陳師傅。他來自利苑，水準有幾高唔使我同大家多講！但估佢唔到的是最正不是利苑水準的燒腩仔，是水準還有一山高的燒黑鬃鵝。師傅的「上皮水」工夫超厲害，他將「皮水」的糖份控制得剛好，不會太多令鵝皮又黐又燶，又不會太少令鵝皮唔夠色、唔夠脆，上水時又夠均勻不會濕潤得令鵝身起皺紋，而且鵝身吹得脹，風乾足一晚入味才燒，燒鵝隻隻脹卜卜，鵝皮不會打晒摺，加埋黑鬃鵝，6 斤一隻，骨細厚肉鵝味又濃，連新特首都讚。

海鮮也是一大亮點，原因是大眼老闆有門路拿來勁爆的巨型海鮮，好似阿拉斯加大蟹及波士頓龍蝦，最勁有 8-10 斤， 前者成隻星際蜘蛛的造型，單是蟹腳已有女士前臂咁長；後者仲誇，一隻箝已是本地龍蝦咁大，有幾厚肉，麻煩自己諗吓！連冷門的胭脂蚌、超過 3A 級的扇貝都有，其他如花甲、蟶子和蝦類都靚過人，而且價錢平足西貢兩成，深水埗無海鮮小炒館，點會唔爆場。

利星火鍋海鮮小炒
地址：深水埗福華街 151 號地下
電話：2386 3381

i PAD 明星店

跑馬地是明星的小炒蒲點，除了一些老牌的，最近有新貴出現，開業幾個月，林青霞、葉蒨文及蘇永康這些識食明星已經食咗幾次。此店同一般的小炒店不同，用 iPad 落單，地方又似足 fine dining 餐廳，又有洋酒吧，時尚到不似小炒店。

偏偏這店專賣有香港特色的「香港菜」，當中以小炒最耍家，而且師傅有料到，足足有 40 年功力，做起小炒來思維就是不一樣，安格斯牛肉炒牛河、做水煮；桂花酒釀不煮丸子，反而用來配炸子雞；還自製果醬加陳醋做咕嚕肉，出面真是未食過。新思維以外，最勁還是師傅手藝，方脷油泡得滑，咕嚕肉酸甜恰到好處、裏頭又鬆化；最厲害還是那道「金釀銀」大宅門炒飯，全碟無一粒白飯或上蛋漿上得不均勻的飯粒，顏色靚到暈，小炒原來可以咁華麗。

壹玖捌叁
地址：跑馬地載德街 2-4 號 1 樓
電話：2893 3788

移形換影 小菜王

鴨脷洲小炒店唔少，但近期最 hit 的，一定是這間莫屬，晚晚未到七點已經爆場。這店夠掂全因她專做大街一帶沒有供應的小菜，講白點即係將舊菜來個「移形換影」做出全新配搭。有無諗過豬手可以當香肉做？黃鱔唔蒸，當脆魚皮般灼熟凍食仲正；仲有芝士唔再同龍蝦一齊玩，反而搭上扇貝。配搭絕對不是亂咁嚟，係咪為沉悶的小炒界掀起一片漣漪先？

師傅同老闆精靈有諗頭，諗到「舊菜新做」以外，還有不少特色菜，好像脆皮燒 BB 米豬、鐵板黑椒豬手、油浸筍殼魚及自製墨魚餅等，唔使下下咕嚕肉、椒鹽骨咁鬼悶。原來小店是長沙灣「大中華」班底，大廚 Alex 更煮過菜畀譚校長同曾智偉等明星食，炒菜勁有鑊氣，而且要求多多，日日行街市買靚海鮮，肉類唔靚都唔要，抵佢開業 3 個月就人氣急升。

小炒皇
地址：鴨脷洲大街 119-121 號地下
電話：2552 6638

一店兩食 點心x小炒

網上好評點心店譚點，悄悄在長沙灣開新店，但今次唔單止搞點心咁簡單，仲趁趁小炒熱，玩一店兩食，朝早開午市賣點心及小炒，晚市主攻再高級點的小炒菜式。唔好以為做開點心，小炒係求其亂加純為搵錢，老闆祺哥為搞好小炒，千揀萬揀才找到大廚杰哥回來。杰哥猛料，曾在高檔中菜廳國福樓工作，又做過馥苑及利苑等中高檔次菜館，煮功有番咁上下。

今次為點心店搞小菜，都有自己風格，街坊小菜升級用了靚料，好像平凡到不能再平凡的粟米斑塊，師傅將雪藏斑片變成高級晒的新鮮劏龍躉肉，而且講究到唔用金寶罐頭做汁，反而以新鮮粟米推出甜甜的汁醬。認真的師傅甚至棄用供應商，天天跑勻深水埗自己揀靚海鮮，有點誠意；而且不少菜式更是酒家級的「多工菜」，好像半鹹鮮，師傅掛足一晚吹乾，等鹹香入晒魚身，連他都話自己的海鮮做得最強。

譚點
地址：長沙灣元州街481-483號地下
電話：2959 0330

隱世深黑肉餅

北帝街一向是小炒之城，除了剛剛被蘇民峰煲起的「好知味」，旁邊還有間無咁起眼的實力小炒，大廚係後生仔輝仔，做菜天馬行空，單是開舖之時， 吃了個墨汁意粉就變出這個墨汁肉餅，就知這個男仔幾有諗頭。唔好以為它只不過是肉餅加墨汁咁簡單，原來加了墨汁會令肉餅變得乾硬，輝仔都試過不下數十次才得出 1:1 的完美肥瘦比例，還得邊搓邊撻邊加墨汁，肉餅才夠「黑仔」兼亮麗，做工比普通的肉餅煩足幾倍。

更難得的是卅歲未夠的他真心愛煮，貴為老闆但不是一味指指點點，而是晚晚親自埋鑊，店內雖負擔不起名貴醬料和材料，但他以心機搭救，好像自己釀甜米酒來浸蝦添味；每回炆鮑魚來特別留起鮑汁做芡；還費時地自己磨豆漿做豆腐，睇得出他老實不愛欺騙客人。

烏卒卒肉餅外，推介試埋他將醉蝦、椒鹽蝦二合為一「椒鹽醉蝦」、平民的改良版「麥皮蝦」、還有上枱可以沸騰足 15 分鐘、深圳雞煲變化來的「石窩雞」， 統統都有新意但不是亂咁嚟。

景驊園
地址：土瓜灣北帝街 28 號地下 A 舖
電話：2768 8839 / 2768 8963

(原文摘自《U Magazine》文：sieg、圖：Lamlam、Ken、May、Suki、Ki)