任食Antipasto的快樂！
去飲酒，酒吧通常奉上果仁薯片蝦條，還要是收費的！點似意大利人咁幸福，當地酒吧供應的，竟是個小型 Antipasto（前菜） buffet，切肉芝士薄餅統統免費任食！
「是真的，」餐廳 Divino Patio 經理 Marco Di Giacomo 說：「因為意大利人通常 9 點後先食晚飯，放工又未返屋企，常常去酒吧 Happy Hour，我們叫作 Aperitivo Time，唔少酒吧會在這時段，供應免費 Antipasti，只要柯打一杯飲品，就可以任食。」別以為給你的都是垃圾小食，Marco 數得出有切肉、芝士、薄餅、醃物等，開飯前隨時飽了大半。
如此「賣大包」，以為酒吧蝕硬？其實不過是拋磚引玉，想大家 eat more drink more！當地人也不計較，開心最緊要，邊拿起紅酒白酒啤酒 Spritz 暢飲，一杯再一杯，品嘗美食，享受人生！
灣仔新開的 Divino Patio 亦來仿傚，每日傍晚 6 點推出 Finger food buffet 吸客，Marco 笑言比當地的更豐富。瞄一瞄上食物，十來款包括切肉、薄餅、雞串、意式炸物、沙律等，按照「柯打一杯酒，即可任食」的規定，只需柯打酒單上最平的，即 $65 杯的 Processo 就有交易了。
看美食源源供應，客人亦屬斯文一族，不會搶食，揀坐開揚的露天位最歎！除這個抵食 buffet，餐廳其餘食物水準亦高。首推以電烤爐炮製的烤雞、烤乳豬，全是意國貨色，香噴噴夠 juicy。這裏不僅以 50 年代意大利雜貨店做設計藍本，還真的設有凍肉櫃酒架，隨時飲飽之後買走食材回家再煮大餐！
DIVINO PATIO
地址：灣仔港灣道 28 號灣景中心 1 樓 11 號舖
電話：2877 3552
飲酒不忘食粟米！
「飯桶」說：「三餐不能無米。」墨西哥人話：「三餐不能無粟米！」一日到黑食粟米，就連 Happy Hour 時，飲住啤酒 Tequila，也愛把一枝枝甜粟、餡料多變的 Taco 放入口，暱稱他們為「粟米人」實不為過！
粟米可以幾百變？單看墨西哥人食的 Tortilla 就知，這一塊塊用粟米造的薄餅，可因應大小、厚薄、煮法等，而演變成 Taco、Tostada、Enchilada 等美食，醬汁、餡料互相 mix and match，食極唔厭。
還有一枝枝甜粟，我們有烚粟米，這墨西哥的街頭小食，卻是燒完再加辣椒、蛋黃醬、芝士碎等去食，好有驚喜！由街頭食到入酒吧，甜粟也用來佐酒，當地人愛約埋朋友飲幾杯，以啤酒加辣醬辣椒調製的 Michilada，以及 Tequila 最受歡迎，來點小食就滿足。
Tequila 絕對是墨西哥名物，只因它用上當地盛產的仙人掌科植物龍舌蘭（Agave）釀製，墨西哥人無論日常或喜慶事都愛飲，酒精濃度高達 40 度，個個飲完都面不改容，好酒量！鑽進蘭桂坊的小巷子，來到墨西哥餐廳 BrickHouse，要食要飲都不缺！
行政總廚 Austin Fry 來自美國德州，因愛墨西哥菜，經常到墨西哥城偷師學藝，熟悉其飲食文化，他說：「墨西哥菜味道辛辣、濃郁，菜式碟頭大，方便 sharing，我稍將其賣相改良，顯得更吸引。」
必食 Tortilla、Taco，前者每日自家鮮製，後者則由 Tortilla 演變出來，有牛 / 豬 / 雞 / 魚款式，配以自製醒胃醬汁，啖啖滋味。店子還從當地引入辣椒、芝士、香料、仙人掌等，做出原裝風味。別忘了來杯酒，酒單上 Tequila 啤酒雞尾酒餐酒齊備，暫時變身墨西哥人。
BrickHouse
地址：中環德己立街 20 號 A 地下
電話：2810 0560
立飲Tapas Time
我佩服，西班牙人有超好腳骨力，站着飲酒站着食 Tapas，轉眼就一句鐘，還輕鬆吹水覺得好 free！也難怪，當地的 Tapas Bar 都有 counter 讓人飲酒食 Tapas，人人練就鐵腳功，都算是西班牙的獨特風情！
西班牙有個出名的馬德里廣場（Plaza Mayor），裏裏外外都開了很多 Tapas Bar。走到灣仔月街，亦發現 Plaza Mayor 的蹤影，這西班牙餐廳，就像一道隨意門，將兩地連接起來。如此像真，全因老闆是西班牙人 José Martino Alba，身兼西班牙商會主席及經營西班牙食品貿易公司。
Tapas 加上酒精，彷彿就能忘掉煩惱，José 笑說：「這是西班牙人生活的靈魂支柱！當地人會約埋去公司或屋企附近的酒吧，同一間 Bar 可以熟到一星期去幾次。還有，每間 Tapas Bar 的食物選擇不多，招牌菜亦不同，通常會連去幾間飲飲食食。」
Tapas 多變，可由朝食到晚，或鹹或甜或冷或熱，肉類海鮮蔬菜齊備，燒炸煎煮各有特色，最常見有火腿球、八爪魚、青口、魷魚圈、薯仔等。這裏的食物味道對辦，也別錯過獨家的 Iberselec 黑毛豬火腿，柔軟甘香，想飽肚點，傳統的西班牙海鮮飯也是好選擇。
osé 說：「配酒視乎個人喜好，西班牙南部人會飲 Sherry，東北部的人慣飲汽酒 Cava，我午飯前食 Tapas 會配啤酒，晚飯前食 Tapas 就飲紅酒。」似乎配甚麼都好，但偏偏 Sangria 卻不入流，他解釋 Sangria 不會用靚酒炮製，較平價，通常後生仔、遊客較捧場，或者去戶外、沙灘飲就 feel。
Plaza Mayor
地址：灣仔月街 9 號地下
電話：2866 6644
革命！落 Pub有啖好食！
「英國人習慣放工去飲吹水，同朋友、屋企人、情人無所不談！」餐廳 Harrington's 總經理 David Guthrie 話，英國人落 Pub 的歷史悠久，每個城市，甚至每條村都有 Pub，就算得幾戶人住都會有間 Pub，聽落都幾瘋狂！
「啤酒、Gin tonic 同 Pimm's 好受歡迎，食物就要數 Fish and chips、Bangers and mash 及各種英式 Pies 最常見，不過，在 Pub，飲酒先係重點。」David 解釋 Pub food 一向難食，終於，1990 年初英國掀起一場飲食革命，將 Pub food 升呢！「大家都想要有質素的食物，拒絕再食垃圾，造就了 Gastropub 的出現！」
Gastropub 一詞是將 Gastronomy（美食）及 Pub 結合，可解作開在 Pub 內的餐廳，或將兩者合一，食物會由專業廚師用靚料炮製，重視質素。時至今日，Gastropub 只佔英國 Pub 的一部分，因要有好食物，才可稱作 Gastropub，要求甚高。不過置身當中，氣氛跟 Pub 一樣 casual，食物有水準又較餐廳抵食，深得客人喜愛。
Harrington's 是本地一間帶濃烈英倫風格的 Gastropub，傳統英式 Pub food，國際美食如意粉、牛扒等俱全，酒類則包括啤酒、烈酒、餐酒，選擇過百款。「這裏以食物為主，飲酒為副，同一般 Pub 唔同。此外，餐廳的烤肉很有名，專用焗爐燒牛肉、燒雞及燒豬等，英國人好重視星期日的午餐，一定要食烤肉，所以客人會來食 Sunday Roast，試過三百幾人齊齊開餐，好熱鬧！」David 說。
HARRINGTON'S
地址：中環蘭桂坊 17 號 1 樓
電話：2522 1823
(原文摘自《U Magazine》文：Pam、圖：Suki、Lamlam、Keeyau)
