南丫島　環島美食遊

西式素食清清油膩

找一間好吃又好坐的店子，素食餐廳「農舍」是不少人的心頭好。店子由 Dan 及 Ron 兩兄弟開設，原址規模較小，主打外賣，到後來，逐漸搬大舖變成素食餐廳，一直深受歡迎。

餐牌偏向西式，墨西哥卷、漢堡包、意式三文治、千層麵等，甚多選擇，而無論賣相、味道都不錯，一改素食沉悶刻板形象。Ron 會揀選本土生產的蔬菜、香草，新鮮之餘，還可減低碳排放；亦按季節選材，像曾以仁稔、子薑等入饌，食出最佳時令滋味。

烹調時注重健康，選用橄欖油，對心臟有益，餐牌上沒有油炸食物，就連薯條也棄炸取焗，同樣香脆。自家製美食也不少，像有機小麥搓製做薄餅，乳酪自家發酵，食得健康。

飲品也帶自家風格，一系列正能量特飲，像有甘筍、蘋果、橙汁及薑汁調製的 Ginger Spice，蘊含豐富維他命，又如集杏仁、核桃、小麥胚芽等的 Energy Booster，能提供身體所需元素等。吃完一餐 green meal，再開始行山之旅！

農舍
地址 : 榕樹灣大街 26 號地下
電話 : 2982 6934

望海好Hea 餐廳

索罟灣寧靜、樸實，還保留了點點漁村感覺。想找個地方 Hea，望望海景，開業幾個月的 LoSo Kitchen 就合晒要求。店子揀了個好位，有超闊靚海景，平日響市區，以海景送飯肯定唔平，這裏卻很相宜。內裏布置跟附近的海鮮酒家不一樣，很隨意很年輕，牆上有可愛畫作，又以戶外餐桌椅，配七彩色坐墊，遠看都覺搶眼。

食物看似西式為主，但其實不拘一格，牛扒意粉炸魚外，還有招牌東南亞小食，炸蝦餅、沙嗲串燒、咖喱牛腩配香酥餅等，選擇超多。奶茶咖啡檸茶固然有，但店子有心思，也供應柑桔椰果特飲、椰汁芒果特飲、巨峰提子蘆薈梳打等，兼賣多款外國啤酒，有驚喜！還跟得上潮流，提供免費 WiFi，跟大班朋友柯打美食，飲啤酒傾偈上網，足夠消磨一整個下午，睇埋日落直落夜晚都得。

特別一提，店子更有貼心服務，可免費代客訂蛋糕鮮花，想搞生日會、慶祝特別日子都得，兼且免收切餅費。有人代勞，兩手 fing fing 即能為另一半、朋友製造驚喜，好有計呀！

LoSo Kitchen
地址 : 索罟灣第一街 28 號地下
電話 : 2982 8623

貨真價實老字號

一場來到，依然是想食海鮮？推介你到連島民都讚的森記海鮮酒家。這森記開業四十多年，原本以賣點心起家，後來轉營賣海鮮，是這裏的老字號。環境格局沒特別，同樣有海景，來捧場的食客都是着眼食物質素，貨真價實至係重點。

大魚缸內有齊東星斑大青斑鮑魚仔象拔蚌龍蝦，煮法亦多，薑葱炒花雕蒸白灼芝士焗統統有齊，店員仲會推介至佳食法，例如紅蟹最好花雕蒸，肉蟹則啱薑葱炒鹹蛋黃避風塘等煮法。必食椒鹽煮法的海鮮，皆因店主鄭生用靚料炮製椒鹽，特別惹味鮮香，椒鹽蝦、椒鹽鮮魷是人氣美食，個人心水是每隻成呎長的斑馬瀨尿蝦皇，未食已覺震撼，啖啖肉入晒味，食得出夠鑊氣！

此外，豉油王中蝦、黃金鹹蛋蟹、豉汁蒸元貝及油鹽水花蛤等，都是此店招牌菜。散點以外，還有套餐可供選擇，由 2 人到 12 人都啱食。

森記海鮮酒家
地址 : 索罟灣第一街 26 及 27 號
電話 : 2982 8241

(原文摘自《U Magazine》文：Pam、圖：Lam Lam、Kam、Keeyau、Sky、Suki)