林澄光 Michael(食家)：「來太湖，宵夜變得有好多選擇，想飲茶、食小菜都得，肯定個個都滿意！呢度就算半夜都有唔少人幫襯，好熱鬧！」
太湖開業廿多年，曾獲不少飲食獎項，去年由地舖搬上樓，人氣依然，仲愈夜愈旺！少年食神 Michael 就話：「地點就腳，食物選擇多又抵，飲夜茶都有唔少點心選擇，點會唔多人？」
這裏的宵夜時段特別早，晚晚 9pm 至 3am，當 late dinner 食都得，深受酒店業、零售業、傳媒界朋友歡迎，連遊客都慕名而來。食物選擇多，炒粉麵點心小菜燉湯海鮮有齊，更推出優惠價，點心最平 $10 起，炒粉麵 $48 起，大擦一餐都唔傷荷包。
Michael 愛跟大班朋友開餐：「我鍾意飲茶，想夜晚飲茶食點心，坊間雖然有點心專門店，但唔似呢度咁有酒樓氣氛。」他推介干蒸牛肉賣，牛肉蒸得鬆軟彈牙，內裏仲有唐芹粒、冬菇粒，夠清鮮。
宵夜時段樽裝啤酒有特價，最襯佐酒小食，必點三葱煎蠔餅及辣酒煮翡翠螺，前者加入洋葱、乾葱及葱等炮製，比一般煎蠔餅惹味，質感鬆脆；後者選用加拿大翡翠螺，大隻爽彈，香辣卻不嗆喉，叫人吃不停口！
太湖海鮮城
銅鑼灣駱克道 463-483 號銅鑼灣廣場二期 9 樓
2893 0822
(原文摘自《U Magazine》)
