日台 hit 爆 KuKuRuZa 爆谷香港食到!

發佈: 2016.12.16
文:

KuKuRuZa Popcorn 來自西雅圖,但去到日本、台灣迅即爆紅,香港粉絲等咗咁耐,佢終於喺香港着陸!點解佢咁紅?因為爆谷口味出名特別, 唔係大路鹹甜口味。腰果焦糖、芒果、酸忌廉洋葱,共有 30 多款獨家調製味道,今次香港 pop-up 店就揀咗 8 款人氣口味,統統日本直送,包括 黑白朱古力、經典焦糖、夏威夷海鹽焦糖、松露牛肝菌、酸忌廉洋葱、白朱古力抹茶、呍呢嗱黑桑子車打芝士,款款都好有新鮮感!
日本、台灣最 hit 嘅「夏威夷海鹽焦糖」,香港 Pop-up 店都有!用焦糖爆谷做 base,再加上夏威夷嘅粉紅海鹽,爆谷香甜滲點海鹽嘅鹹香,好食!仲有抹茶控最愛 — 用抹茶粉製嘅「白朱古力抹茶」同冬日限定「黑白朱古力」。
(左起)經典焦糖、車打芝士、松露牛肝菌
坊間少見嘅松露牛肝菌口味係人氣 item,爆谷微鹹輕盈,仲帶有松露飄香,感覺好矜貴。
(左起)呍呢嗱黑桑子、酸忌廉洋葱
成粒粉紅色嘅就係呍呢嗱黑桑子爆谷!以為佢加咗黑桑子會偏酸,食落竟是甘甜,酸咪咪。店員話好多男客人都鍾意食粉紅色嘅黑桑子爆谷,估唔到喎!
(左)磨菇型、(右)蝴蝶型
有別於一般爆谷製法,KuKuRuZa 嘅爆谷唔用油炸,改以熱風烘烤,入口無咁油膩,用手食都唔會油淋淋,感覺亦無咁熱氣。用 2 款粟米炮製,做出「磨菇型」和「蝴蝶型」形狀,店員話爆谷嘅形狀係因應口感、口味而 mix and match ,大家吃時可留意下自己食緊係渾圓嘅「磨菇型」定似蝴蝶展翅嘅「蝴蝶型」爆谷。
2 Gallon (8 款口味 S size)$465
日、台分店均有大、中、小 3 個包裝,而香港 pop-up 店暫時只有小碼包裝(50g),並以 3 款禮袋、禮罐發售,暫時未有得單售喔! 禮罐裝嘅「2 Gallon」有齊 8 款口味爆谷,罐上仲有聖誕雪人圖案,送禮或開派對最啱!禮袋都分別係 3 款($115)同 5 款($199)口味嘅爆谷,不過就無得自己揀味道嘞,配搭已定;新年可當福袋送畀 frd 子!
Pop-up 店會開到明年 2 月 5 日,之後再想食點算?唔使飛去日本台灣,因為佢 3 月會喺灣仔開舖喇!同台灣店一樣賣 10 款爆谷,到時可以單買自己鍾意嘅口味啦!
KuKuRuZa Popcorn 期間限定店
日期:12 月 15 日至 2017 年 2 月 5 日
地址:灣仔皇后大道東 202 號 QRE Plaza 地下
電話:2743 8617
營業時間︰11am-9pm
文︰Louise、攝︰May

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more