旺角中心變身新一代食場，最近仲有星級味力踩場，大隻仔趙勁皓（King）拉埋老友陳柏宇合作，於旺角中心開設饅頭漢堡專門店！將中式饅頭 crossover 西式漢堡包。中西合璧嘅饅頭漢堡包，源自一班朋友於 King的「北京老家」食飯，咬住饅頭之際諗到；用吸汁的鰻頭，夾住唔同食材一定好好食，於是慢慢改良成夾住牛肉漢堡及沙律菜的饅頭漢堡包。牛肉漢堡每塊足 4 安士，選用澳洲牛角肩位置加洋葱、蒜、香草等，每日以人手打製，牛肉漢堡扒唔會留過夜，避免因長時間冷藏而變乾；食落肉味濃郁，肉汁豐富，咬開唔會散開變肉粒！身為健身教練的King，又會唔會將健康的concept 放入饅頭漢堡內？無！小店所有出品都係邪惡底！必試雙重芝士饅頭漢堡，牛肉漢堡釀入車打、水牛及 mozzarella cheese，一咬即拉出勁長芝士拉絲。配埋沙律菜食，感覺又唔算太肥膩！King話月尾會陸續開多幾間分店，好期待！
趙勁皓（King） 拉埋老友陳柏宇再次合作，於旺角中心開設饅頭漢堡專門店。
牛葉雙重芝士饅頭 $48
將車打、水牛及 mozzarella cheese 釀入牛肉漢堡內再煎，食時先嘗到牛肉香，再咬到中間就可以拉出勁長拉絲，芝士鹹香又能令牛肉漢堡扒更軟滑。
牛葉船 $68
8 安士澳洲西冷扒煎至 5 成熟，再灑上烤蒜粒，好香口。每份牛葉船可於芝士、磨菇、墨西哥辣汁、芒果、沙嗲、咕嚕等揀兩款醬汁。
牛葉芒芒饅頭 $38
淋於牛肉漢堡面的係以新鮮芒果打成的醬汁，芒果酸甜及果香可中和牛肉油膩。
牛葉流心半熟蛋饅頭 $46
呢個半熟蛋饅頭，大廚先將煮好嘅流入蛋，放入漢堡扒內，配以大量半融芝士及沙律菜。大啖一咬即唧出蛋黃汁，加埋牛肉嘅肉汁及軟滑鹹香芝士，勁惹味！
The Beef and Leaf
地址：旺角彌敦道 688 號旺角中心 1 期 1 樓F87A 舖
電話：從缺
營業時間：12nn-10pm
原文摘自 U Magazine
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
