點解這間泰國餐廳以鱷魚命名咁搞鬼？門口仲貼上 Q 版鱷魚貼紙，室內又掛上巨型鱷魚神話的壁畫。原來神話起源於泰國北部的省俯 Phichit，正是老闆楊生泰籍太太的家鄉，她媽媽在家鄉做食店生意有 40 年之久，做牛雜豬雜最耍家，於是將農村風味的牛雜帶來店中。楊生打通人脈，好不容易透過牛肉買手取得新鮮牛雜，同上超過 10 種材料，包括牛骨、香茅、檸檬葉、炸辣椒、薑等熬 3 小時成湯底，來炆牛雜，份外鮮爽。紅汁燒肉飯、臭草煎蛋這些簡樸地道農村菜都有得食！
最驚喜係一道花工夫的手工菜「小鳥等愛」，小鳥造型勁 cute，雀仔頭用薯蓉球製成， body 以蝦膠包裹黑草蝦炸。蝦膠先琢後撻，單是這工序花足半小時，即點即做，入口蝦味清甜又彈牙。喜歡椰青的要試試椰青焗飯，加了椰青水並釀入原個椰青一齊焗，飯粒吸盡椰青水的清甜。
在泰菜圈內打滾了廿年的泰國師傅，深明店子如只倒模般一式一樣，難以在九龍城區突圍，故此在菜式設計上花點心思，每日更親自去街市揀海鮮、靚椰菜苗，去雜貨店挑選泰國香料，避免供應商交次貨，就是這些細節位做得夠認真。新開張仲有優惠，晚市消費滿 $200，送自選青檸烏頭魚／炸蝦餅／酸辣鳳爪菜式一道，勁筍！
小鳥等愛 $98
此手工菜由一位泰國烹飪達人所創，大廚參考再改良。薯蓉頭的眼用黑芝麻扮，嘴用紅蘿蔔做，以蝦膠包著黑草蝦的身驅蝦味甜鮮，蘸梅醬食。
泰式牛雜 $98
新鮮牛雜主要有牛肚和牛腸，咬落有彈性，富牛味而不羶；牛骨湯滲溫和香料味，不算辛辣。
青檸檬、辣椒明爐烏頭 $158
魚汁加了新鮮青檸和辣椒，辟走烏頭腥，酸辣幽香，更吊味。
椰青焗飯 $98
有蝦、魷魚和青口，魷魚尤其鮮嫩。茉莉香米吸收了椰青水的清甜，面頭下了肉鬆及腰果，更添香脆。
焗乾咖哩海鮮 $98
以辣椒、椰汁、蛋煮汁，伴以蝦、青口、魷魚及椰菜，先煮後焗，口感勁似咖喱炒蟹隻汁，撈白飯好惹味。
門口盛載太陽花的單車、室內的花朵牆貼、座位格局都帶點西式，店主希望環境企理，讓客人感到cosy。
鱷魚泰國餐廳
地址：九龍城南角道 16 號地下
電話：2701 7323
營業時間：11am-1am
收費：現金及信用卡，設加一
交通：旺角先達搭小巴在衙前圍道下車
泊車：九龍城廣場 $18/hr
平均消費：$150
原文刊載自U Magazine
