少食多滋味！一盅兩件點心餐

飲茶？約唔到一班人都好難成事，獨男獨女一名，真係搵鬼去同你歎茶？咪傻，22 世紀啦。歎茶係一丁友都得嘅，在太古城新裝美食廣場 Treats 內的茶茶居，早、午、下午茶到晚餐供應的點心，全屬一人的「自樂餐」，擺明獨食都 alright。

安慰寂寞的心的一人份「自樂餐」，濃縮了整個飲茶體驗，因為一份已包括 4 款點心（兩件蒸的、兩件炸或焗的）、飯或沙河粉及米湯灼菜，分量飽肚，一人前都可以歎茶。點心更是即點即製的，夠晒新鮮熱辣。店內的點心種類頗多元化，套餐唔夠食可額外單點，像走懷舊路綫的芝麻卷、鳳凰煎米雞和灌湯餃等，其中煎米雞以即把糯米雞加蛋漿煎香，坊間較少見；而灌湯餃就回歸傳統食譜，把蝦、帶子和雞肉等餡料蒸過，豐富湯汁全包在灌湯餃裏，全非平日的湯浸餃咁簡單。部分點心又加了健康新元素，像叉燒酥加了檸檬皮更清香解膩、流沙包就改以燕麥做皮。別以為食點心就成擔豬油吞落肚，這裏所有菜式都以無膽固醇的米糠油烹調，食點心都 keep 到身型先至有彈藥追男仔、追女仔嘛。

套餐內的沙河粉也堅揪，用上米香濃郁的泰國溝巴基斯坦香米做河粉，最勁係店內自家磨米漿鮮製而非麵廠交貨。師傅每天在店裏磨出米漿再以用竹筲箕拉成粉蒸製，入口米香濃而煙韌，仲有久違了的粵式沙河粉的米鮮香味。點心河粉等全部在店內的開放式廚房製作，可以邊食邊睇「Live Show」。

這裏設有吧枱位，一個人來都吃得自在，仲可看到師傅製作點心和熱辣辣出爐。

自樂餐 $78 
筍尖鮮蝦餃、乾蒸牛肉賣、檸香叉燒酥、荔甫炸芋角 x 牛筋腩蒸沙河粉
牛肉燒賣加了檸檬葉和馬蹄，入口清新爽口不油膩；叉燒酥加了檸檬皮，甜中帶清香；炸芋角就以新鮮芋頭搓皮，再包着蝦和帶子等饀料，外脆皮輕軟。牛筋腩加了花椒、八角、柱候醬等紋，惹味又夠腍身。

半開放式廚房的玻璃上有點心公仔圖案，得意！

除了吧枱，亦設梳化位和小圓枱，空間比一般點心專門店闊落舒服。

公仔圖案餐具，細微細眼處足見店家心思。

自樂餐 $78
娥姐素粉果、南瓜芋絲餅、素雞絲春卷、舊日煎馬蹄糕 x 南瓜芋頭糙米飯
套餐中也有素食之選，素粉果內有甘筍、木耳、沙角、馬蹄和雪耳，味道清甜；自家創的南瓜芋絲糕以清蒸後再壓成糕，甜而不膩；馬蹄糕只用馬蹄粉和黑糖做材料，不似坊間用生粉，入口香軟彈牙。

自樂餐 $78
甫魚滑燒賣、松子菠菜餃、家鄉鹹水角、沙律炸蝦角 x 排骨蒸沙河粉
燒賣最為特色，加了大地魚粉在餡料中，豬肉外還加了原隻蝦仁和冬菇；菠菜餃內有滑蛋、爽脆的松子、素蝦等。鹹水角內有蝦米、菜脯、肉鬆和冬菇。值得一提是蔬菜以米湯灼過，帶有豐富的米香又有點漿口。

茶茶居
地址：太古太古城道 18 號太古城中心 2 樓 255 號舖 Treats 內
電話︰2832 2820
營業時間︰8am - 10pm 
備註︰茶錢每位 $6，設加一

原文刊載自U Magazine

原題：擺明獨食　一盅兩件點心餐

文章經編輯修改