邊個係阿鴻？咪就係「阿鴻小吃」主理人鴻哥（黎偉鴻）！繼自助 style 快餐店「鴻師傅」後，最近佢喺隔離舖有新搞作——賣甜品！明明做中菜，點解做甜品？鴻哥解釋：「試過參加飲宴，菜式沒甚麼，甜品卻做得馬虎，令人失望。配中菜的甜品，應該可以做得更好。」碰巧他的私人助理係甜品高手，碰巧有合適舖位，他就敲定開甜品店！
店名唔叫「阿鴻」，叫 Hung’s Dessert，擺明走年輕路綫，所以餐牌上唔止中式糖水，也有芝士餅、奶凍等西式甜點，分別由兩位大廚負責。17 款選擇不算多，但不少都加入流行元素，綠茶、栗子、芒果、桃膠，花款時時轉，更迎合健康潮流，以低糖招徠，甜度比一般糖水減少一半，糖水又以冰糖代砂糖煲，清潤不死甜。
中式首選腐竹薏米銀杏糖水，鴻哥將炆招牌南乳齋的腐竹頭尾部分都用來煲糖水，腐竹分量比坊間多，入口果然豆味超濃；桃膠專挑大小適中少雜質的，顏色偏黃，膠質特別勁；薑汁奶凍自家磨薑汁做，真係夠薑；栗子蛋糕用法國栗蓉做忌廉和 mousse，又滑又香。水準高，鴻哥自言沒秘密，靚料 +足料 + 心機，就係咁簡單；加上阿鴻大名，開業幾天，生客、熟客、OL 已湧住來試。
椰汁桃膠糖水 $26
桃膠 size 適中少雜質，膠質十足；不配紅棗雪耳燉，改配椰汁，似椰汁雪蛤膏，更受女生歡迎。
栗子蛋糕 $40
外層是栗子忌廉，很幼滑；內裏是海綿蛋糕和栗子 mousse，以法國栗蓉製，栗味道特別重；以自製黑朱古力脆脆點綴，加添口感。
雪山芒果蛋糕 $38
賣相很討好！蛋糕軟綿有蛋香，內有吉士忌廉和呂宋芒果肉，配芒果汁，香甜不膩。
紅豆抹茶奶凍（前）、Tiramisu 各 $32
奶凍加入宇治抹茶粉製，有清幽茶香兼質地幼滑，亮點還有大大粒紅豆！Tiramisu 有多層浸了咖啡酒的蛋糕，啡香、酒香集一身，口感厚厚的。
鴻哥覺得低糖是甜品大趨勢，將出品甜度大大減低。
地方只有 900 呎，但座位濶落；以淺藍色作主色，裝潢感覺年輕得來帶幾分童真。
Hung’s Dessert
地址：觀塘成業街 7 號東廣場地下 26 至 31 號舖
電話：2618 0168
營業時間：11:30am-10pm
原文刊載自U Magazine
↓【免費送🎁】微熱山丘全新造型香蕉窩夫餅乾禮盒100盒！↓
↓ 進駐香港十週年大贈送│送埋香港獨家限量版布袋～↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
