創新!點心店篤芒點餐

發佈: 2017.03.29
文: Pam、Amy

近年唔少食店設自助點餐機,對住個 mon 篤幾篤,再拍卡俾錢,好方便。
估唔到點心專門店都有!說的是九龍灣新開的「俏米」。店前一排自助售賣機,指引清晰,只需篤下想食的點心,或早餐/午餐/下午茶餐等,揀好按「完成」,就可以用八達通俾錢。拎住張飛,等電視熒幕顯示號碼,再自取食物。
睇環境,布置幾摩登,落地玻璃望到觀塘海濱,開揚舒服,屬新派歎茶熱點。點心款式則偏傳統,約 40 款(按不同時段供應)選擇,主廚方師傅入行 40 年,更曾到過日本、新加坡工作,手藝紮實。蝦餃燒賣蛋撻仔奶黃流沙包有水準,較特別的有海鮮米網腸,軟滑夾香脆,更有少見的肉骨茶飯餐、海南雞飯餐,是方師傅當年在新加坡學藝偷師回來,味道唔錯。

店前一排自助售賣機,點心專門店少見。

創新!點心店篤芒點餐

個 mon 有齊點心及套餐選擇,飲品如咖啡,好貼心地有得揀齋啡、多奶及少奶,揀好就可以拍卡俾錢。

創新!點心店篤芒點餐

海鮮米網腸 $22 起 
自炸米網夠薄脆,包著翠肉瓜、蝦及蟹柳等,外層是即拉腸粉,熱辣辣滑溜溜脆卜卜,過癮。

奶黃流沙包 $23
鬆軟包包內有微沙奶黃餡,鹹香甜味平衡。

創新!點心店篤芒點餐

北菇蟲草花滑雞籠仔飯(連燉湯)$47
以蟲草花冬菇雞髀肉蒸飯,香氣撲鼻,加 $3 可將燉湯轉蟲草花黑蒜燉竹絲雞,原盅燉,必飲。

創新!點心店篤芒點餐

胡椒肉骨茶飯餐及油菜 $50 (午市供應)
肉骨茶飲落胡椒味好香濃,每份都有上等肋排及豆卜,黑豉油自家調味,濃稠,蘸肋排食惹味。油飯用雞湯炮製,粒粒飽滿入味。

俏米
地址:九龍灣海濱道 83 號宏利大樓 1 樓 W4B 舖
電話:2811 2255
營業時間:星期一至五 8am-5pm,星期六 8am-4:30pm,星期日休息

原文刊載自U Magazine

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more