Pazzeria 唔係 Pizzeria, 無 pizza 賣㗎,其實係癲佬嘅意思。店名有段故,話說 15 年前嘅意大利,人人追捧紅白酒,國內啤酒一係係大廠粗製、一係由德國比利時入口,只有個傻呼呼嘅大嚿佬 Mauro 看好手工啤,自嘲地以「癲佬」為酒吧名。Pazzeria 是意國手工啤嘅革命先鋒,因為這店的出現,令不少鐘情葡萄酒嘅意大利人轉陣。舖頭咁樣推一推 , 意國啤業欣欣向榮,由開業初全國只有 3 間 micro brewery,到今日有超過 600 間,都係多得 Mauro 幕後推動。
只得 10 多年手工啤歷史嘅意大利,水準直追啤酒王國德國,別忘了意大利係萄葡酒之王,優勢咪係國內由南到北都有不少好山好水的酒區,水質比英美德更靚,加上南北東西的水,硬度軟度礦物含量甜度都不一樣,釀出的啤酒枝枝富個性 Mauro 與世界冠軍啤酒侍 ( beer sommelier ) Simonmattia Riva 為店挑選國內優質啤酒來港,手工生啤有 14 款、枝裝 50 多種,名牌啤酒 Doge、Stradaregina、Geco、Toccalmatt、Lariano、Gambolo 及 L'orso Verde 都在這裏找得到 。
這裏仲有威尼斯流行立食小食酒館 ( Bacaro ) 影子,從意國引入不少家鄉食材,好似 20 個月嘅巴馬火腿,新鮮布袋芝士 ( Burrata ) 、意大利三星名廚 Enrico Crippa 做的蛋糕,仲有傳統的意大利扁包、燉牛肉等,最貼心每款食物都係有埋配酒指引,味道配搭由專業啤酒師侍 pairing 過,二仔底一定唔會叫錯啤。
( 左 ) La Grigna $ 75 杯
來自意國第二大嘅微型啤酒廠 Birrifilio Lariano,這款是 Pilsner 啤酒,酒體清爽,帶明顯又唔會勁搶鏡嘅麥芽味,仲有少少啤酒花香,尾段苦味不會太刺激 。
Aged Cold cut & Cheese with Toasted Bread $ 120
20 個月的巴馬火腿,柔軟又唔會過鹹,適中的鹹香配啤酒唔會互相搶去大家風頭,其中一款是 burrato 布袋芝士,水牛奶鮮味好突出,吃後飲啤酒會無咗苦味 。
The Bruschetta $ 50
新鮮番茄粒撈匀蘿勒、初榨橄欖油及蒜蓉配麵包,橄欖油是亮點,味道超清新,簡單又美味。
Inoki American IPA $ 75 杯、The First $ 75
啤酒是 GECO 廠出品,充滿濃郁的啤酒花香也有點像梨子與杏桃般的 Yellow fruit 味道,啤酒苦味縈繞口腔,餘韻長。可以配夾了 20 個月的巴馬火腿火箭菜及水牛芝士的 Pladina 意國扁包。
So Sweet $ 75 杯
這款是 Strong ale,稠身而且麥芽味很甜很重,入口無黑啤咁苦澀,反而有點似吃麥芽糖,配甜品或肉類都正。
店內的意國枝裝啤酒多達 50 款,部分更在國際上獲獎。
啤酒杯的清潔度會影響酒味及泡沫形成,所以這裏有套繁複的清潔步驟,啤酒杯洗乾淨後,斟酒前還要經這 3 個步驟清洗力求杯壁終極乾淨。
經理 Stefania 在米蘭總店工作,她對店內啤酒瞭如指掌,有乜記得問佢。
店內仲有英式啤酒用的手揼。
店主 Stefano (左) 誠意打重 Mauro 開海外分店,請來總店的 Stefania 來港打點,保證隊啤體驗同米蘭一樣。
鋪頭設計簡約,有張長長的 common table 畀你識酒友。
Pazzeria Italian Brewery
地址:旺角黑布街19號地下
聯絡:www.pazzeria.hk
營業時間:星期一至四11am-2am,星期五至日10:30am-2am
收費:現金及信用卡,設加一
交通:港鐵旺角站 E出口,步行 5 分鐘
泊車:金雞廣場 $30 hr
平均消費﹕$150
原文刊載自U Magazine