RedMR首推自助餐 分店限定任食任唱4小時

地點:觀塘觀塘道414號One Pacific Centre 12-15樓

電話:3125-3777

香港兩大卡啦OK品牌當中，向來只得Neway供應自助餐，最近RedMR亦加入陣營，推出晚市Buffet，K迷之以後有多一個選擇

分店限定，暫時得觀塘店一間供應，每晚6pm開始，$200有找即可任食任唱4小時。RedMR的食品質素一向評價較高，其中用來送酒的小食和炸物特別受歡迎，就等小編潛入去睇睇自助餐抵唔抵食！

自助餐區設於12樓，如果有得揀，選擇位於同層的卡啦OK房間會較方便。

食品主要分前菜、小食、飯麵和甜品，種類不算特別豐富，大概有50-60款，但勝在款款都是「大路」食品，而且Refill速度快。

開胃冷盤包括有：冷烏冬、蕎麥麵、壽司和卷物，中規中矩，驚喜不大。

至於熱葷方面，除了自助餐必備的炒飯和炒麵外，現場最搶手的非美國燒牛肉和德國鹹豬手莫屬！前者薄切肉質細嫩，配搭濃濃的蘑菇燒汁幾惹味；而豬手就外脆內嫩，一樣值得encore～ 據店員表示，每日菜式選擇可能略有不同，豬手或會以燒排骨或燒春雞代替。

小食則以炸物為主，如雞翼、香芋丸、薯格、春卷等等，Keep住有新鮮熱辣食品補充，必食超香口的蒜蓉法包，蘸紅白湯食好味～

而甜品就有一系列中式糖水、生果、朱古力噴泉等，另有幾杯甜品杯選擇，芒果布甸含極多果肉呢！

每位包兩杯無酒精飲品，加$18的話可轉飲紅白酒或啤酒。整體來講，自助餐選擇不算很多，亦沒有供應刺身、海鮮等易回本食品，不過就有不少卡啦OK的皇牌炸物以及燒牛肉選擇，希望之後會推出更多款式！

「紅人」自助餐收費：

星期日至四 $189/位

星期五、六、公眾假期及前夕 $199/位

*6位或以上提前一日訂座，可享9折

*另收加一 

文：HK港生活