西貢藍色小屋 睇住海景食海鮮

周末放假，只要天氣好，就想入西貢！最近經過白沙灣，有間藍色小屋好吸睛！呢間酒吧餐廳，叫 Padstow; Padstow 是英格蘭一個由漁港脫變成旅遊熱點的小鎮，顧名思義，這裏賣的是海景、海鮮和假日 feel。

樓高兩層，簷篷、拱門、露台，建築設計充滿異國風情；地下是酒吧，有大餐桌有球賽節目，適合一家大小來；一樓是用餐區，烏絲吊燈、盆栽、梳化，感覺 cozy 有情調，露台仲可看海，很受情侶歡迎。天台呢，樹蔭、海景、遊艇，視野更開闊，開揚舒爽，撐起太陽傘，挨在藤椅梳化，最舒服。

餐牌選擇比一般酒吧餐廳齊全，送酒的香口小食三文治沙律燒烤甜品不缺；主打海鮮和 fish n chips、scotch egg 等摩登英國菜。海鮮種類揀得精，時令生蠔、法國藍青口，魚類都有 6 種，像新西蘭的紅魚、鱸魚、銀魚仔等；最受歡迎是龍蝦，用每隻約 500 克的波士頓活龍蝦，肉質特別爽彈，簡單配香草牛油烤，鮮味很突出。Fish n chips，以紅魚炮製，肉質嫩滑油分適中，炸漿加入蘇格蘭 St Mungo 啤酒調製，炸出來特別金黃香脆。

大廚特別在細微細眼處花心思，特別是配菜的醬汁，統統堅持自製，配龍蝦的荷蘭汁，以蛋黃和淨化牛油慢攪製成，比一般的香滑；就是伴甜品的雜莓果醬，都是以紅莓、藍莓、蔓越莓、士多啤梨煮 5 小時，味道天然豐富；麵包自製，漢堡包特別香軟；薯條即點即手切成粗條即炸，口感好又甘香，為簡單的菜式加分。

加分位還有——餐廳的搞作！除了基本 menu，這裏還有 Kids menu 和 Brunch menu，星期日有 Sunday Roast，輸流供應烤 USDA Prime Grade 牛扒、新西蘭羊髀、燒春雞等；星期一呢，有 Steak Night，指定扒類低於半價食得到。哪一天都好，好天氣就來，看天看海吃海鮮，過一個 good day。

拱門、柱子加上藍色裝修和地磚，營造出異國風情。

天台可遠望西貢遊艇會和海景，不少人都考慮來搞小型結婚或 BBQ 派對。

烤原隻波士頓龍蝦 $298
小型波士頓活龍蝦肉質爽嫩，加番茜、牛油、蒜蓉等焗香，蒜香爆破好惹味，幸好大奪龍蝦鮮味。

雜菜芝士釀龍葵菇 $88
Portabello 大啡菇中釀了羊奶芝士、雜菜和松子仁焗香，出爐時香噴噴！菌香中充滿芝士奶羶香，大啡菇咬落多汁。

伯爵茶煮啤梨 $88
啤梨放進伯爵茶中慢火煮 1 小時，淡淡茶香中滲出肉桂甜香；伴呍呢嗱雪糕和自家煮的雜莓醬吃，果香十足。

香煎蟹肉餅 $98
Gulten Free 版蟹餅，在蟹肉中加入薯仔、紅椒、洋葱、青葱等製成，煎得外層甘香，內裏蟹鮮澎湃；沾?草芥末蛋黃醬吃，更醒胃。

地下是酒吧區，設有電視不間斷播放球賽，很受外國人歡迎。

一樓是 Dining area，深木色餐配黑皮椅子，天花垂下烏絲燈泡，寧靜富情調，係情侶撐枱腳好地方。

Padstow Restaurant & Bar
地址：西貢白沙灣 112 號
電話：2335 5515
營業時間：星期一至五 11:30am-12mn，星期六、日及公眾假期 11am-12mn
收費：現金及信用卡，設加一
交通：港鐵彩虹站轉乘往西貢小巴，白沙灣下車
泊車：附近有咪錶位
平均消費：$350

文章刊載自U Magazine