早前於西營盤開設的韓國Cafe「Seoulmate」韓式木系風格，加上後花園設計木系吊椅及韓文告示板等，令人如置身如首爾家咖啡室般，休閒舒適。
最近Cafe由西營盤搬至銅鑼灣樓上店，地方不但更大，保留戶外花園座位及木製吊椅，更有可供10人入坐的VIP房，避走銅鑼灣鬧市，放空一下。
菜式上同樣有所不同，新增不少鹹甜新菜式。鹹食方面有造型搶眼的「一舊雲下的泡菜炒飯 」($128)，豬腩肉泡菜炒飯配上流心蛋，再加上用蛋白做成的白雲，質地如梳乎厘般，非常可愛。一切開，蛋黃立即流出，滋味不太辣。
炸釀流心雞卷配韓式秘製醬汁($168)，賣相如Corn Dog炸熱狗般，炸雞扒捲着芝士及蘋果粒內餡，味道酸甜。另配上松露薯蓉及韓式辣醬汁，配搭新穎不膩。
爆米餅配柚子芒果煙三文魚($68)，脆卜卜的蒜蓉米餅，配上柚子汁夾雜青瓜、柚子、芒果、蘋果粒。味道酸酸甜甜，清新開胃。
甜品方面都不失禮，砵仔拌綠茶芝士慕斯蛋糕 ($78)，面層佈滿芒果、士多啤梨、車厘子、藍莓、抹茶及士多啤梨脆脆，色彩繽紛。中間放上桃及忌廉扮成太陽蛋般，下層則是抹茶芝士慕絲，抹茶味非常突出。驟眼看似韓國拌飯般，非常搞鬼。
白朱古力波中的秘密花園($62)白朱古力殻內藏抹茶紅豆慕絲、朱古力蛋糕等，賣相精緻。微微抹茶味，不太甜。
士多啤梨韓式米酒奶凍($58)自家製奶凍加入米酒造成，帶微微酒香，非常特別。配上紅桑子、士多啤梨、藍莓及士多啤梨雪糕。
另有泰式豬頸肉炸醬飯($88)及柚子綠茶沙冰($46)。
Seoulmate Cafe
地址：銅鑼灣駱克道491-499號京都廣場4樓
文：HK港生活
↓【免費送🎁】微熱山丘全新造型香蕉窩夫餅乾禮盒100盒！↓
↓ 進駐香港十週年大贈送│送埋香港獨家限量版布袋～↓
↓【必收藏】最新深圳食買玩攻略！↓
↓ 大灣區一小時生活圈！最新打卡熱點／熱門美食等！↓
