連鎖川式火鍋店海底撈正式開業！剝蝦美甲擦鞋樣樣齊

海底撈香港店終於開業！分店位於油麻地，共有兩層，以後想打邊爐又多個選擇～

一人獨食都唔緊要，店內有毛公仔陪你一齊食~

至於香港店同內地店有甚麼相異之處？即睇小編整理的5大用餐須知：

一、娛樂活動較內地店少

收香港店與內地其他分店一樣，提供美甲／手部護理／擦鞋等服務，不過負責人就表示不會提供按摩服務。

另有兒童玩樂區及康樂棋等供應，大家等位時可以消磨一下時間。

等候區有小食及飲品提供，肚餓的話可以醫醫肚，打定底入座時就可以直接食麻辣火鍋喇! 

用餐期間定時會有變臉表演，仲會有機會得到小禮物！

仲有項貼心服務，每張檯都有插座供客人充電，店員亦有齊iPhone/Samsung充電線，充電速度頗快，抵讚！

二、飲品／醬料要加錢

餐廳有水供應，加$15/位就可以任飲酸梅湯+豆漿+檸水，豆漿由黑豆、黃豆、花生打成，質地較濃稠，可以自行加糖調味。

醬料區收費$28，有前菜及多款醬料選擇，連味精都有，在香港火鍋店應該較少見到。

三、湯底逐格收費

食過海底撈的朋友都知道，湯底可選擇單款口味/雙拼/四格，共有7款湯底可選（青椒／三鮮／蕃茄／菌湯／清湯麻辣／清湯無渣麻辣／椰子雞），每款口味價錢都不同，選擇四格的話，每款口味的收費都會較便宜。

椰子雞湯底只限單/雙拼，另有清水($0)可選，2人用餐的話，侍應推薦選擇四格湯底，當中兩格選清水，就最划算！

四、營業時間

試業期間，營業時間為早上十時至晚上十二時，大約晚上十時會停止入客。下午四時左右會安排員工休息，所以亦有機會會有落場時間。暫時只接受Walk-in，之後就可以用電話訂座~

五、香港店有無24小時營業?

負責人表示，香港暫時不會提供24小時通宵營業服務，最快都要半個月後才會有通宵營業，各位夜貓要等多一排喇！

同場加映：店內供應不少海鮮食品，店員會幫客人用筷子剝蝦殼，適合怕污糟怕麻煩的客人！

其餘貼心服務包括:提供橡筋/透明電話套/圍裙/披肩等，叫食物前亦會送上小食及粥品暖胃。進食間店員會主動淥食物及舀去鍋上的泡沫，食飽後會送上瓜子/開心果/糖水/薄荷糖。

洗手間中擺放了洗漱用品及衛生用品，服務相當周到！價錢不算便宜，同價或較低價的火鍋餐廳大有選擇，大家能接受海底撈以服務取勝嗎？

地點:油麻地彌敦道555號九龍行2-3樓

訂座電話:39967799/3996899(試業後)

人均消費:約$300-$400