人氣手工麵包店享樂烘焙一到夏天就會推出招牌冰心麵包，繼上年的忌廉餡增量版，店主 Vincent 又有新構思，幫冰心包換上工序更繁複的酥皮麵包，令冰心包再度昇華！夾埋滿滿的開心果吉士，日日賣足 500 個。這個新口味冰心包大約賣到 9 月下旬，想試要快手。
text│Sakura photo│鑫
曾於日本和台灣進修麵包技術的店主 Vincent，近年專注研究酥皮，要做得好吃之餘，他要求酥層也要美觀，最近他更在香港國際美食大獎 HOFEX 2023，糕點專業牛角包、丹麥酥項目裏分別奪得金獎、最佳經典牛角包、最佳丹麥酥三大獎項。「獲獎當然開心，當然也想把研發的成果與一班客人分享，便構思這款酥皮冰心包。」Vincent 說。
酥皮冰心包的酥皮光看外型食已覺得好食，輕輕一咬會發出「咔嚓」的清脆聲音，憑耳朵都可肯定它相當酥脆。「製作酥皮類的烘焙產品一向好費時，由製作麵糰、搓疊層次、塑形、烘焗、灌餡………超多工序，前前後後要花三日，好辛苦㗎！但眼見麵包咁受歡迎，好有成功感，一切都值得。」Vincent 說。
酥皮麵糰選用日本麵粉、香而濃郁的法國 AOP 牛油製作，酥皮麵糰需要在 26-28℃ 環境下低溫發酵 16 小時，摺疊 4 次、摺出 16 層。由於酥皮油份高，摺疊麵糰時對溫度及製作速度頗有要求，摺疊時麵糰要保持在 2℃、牛油保持在 8℃，手勢太慢，麵糰與牛油的溫度些微上升，牛油溶化便融合不到在麵糰當中，酥層就會黏在一起，焗好酥層就不夠分明。
非常重視麵包「顏值」的 Vincent，他會用兩條長條形的酥皮捲着酥皮麵糰，再發酵 90 分鐘焗製，酥皮內的牛油溶化並產生蒸氣，期間形成氣泡會令麵糰慢慢膨脹，出爐便會做出一層層撐得很美的清晰酥紋，挺身又乾爽， 咬落油潤度適中、很酥脆。
今個夏天 Vincent 選了大熱嘅開心果吉士做冰心餡，酥皮麵包與餡比例為 1:8 ，餡料佔了冰心包七、八成，流心因此超澎湃。香滑細膩的開心果吉士選用意大利和日本開心果醬、法國忌廉、煉奶和自家煮製的吉士醬混合而成，有雪糕的軟滑質感。
這個冰心包驚喜多多，食過你仲會發現麵包內有自家製的大福麻糬皮，酥皮脆、牛油香、吉士滑滑、麻糬煙韌 QQ，口感豐富，好滿足。
開心果吉士酥皮冰心包 $32 個
夏日限定！是店主 Vincent 參考今年 HOFEX 比賽時研發的作品而推出，賣相吸引，麵包外層的酥皮挺身、酥紋分明，金黃色澤恰到好處，加上焦糖粉和開心果碎碎的點綴，一推出就日賣 500 個。
每個冰心包約 100g 重，開心果吉士佔了 70 - 80g，流心澎湃，香滑 creamy，有雪糕的軟滑口感！
【info】
享樂烘焙
地址：新蒲崗大有街 3 號萬迪廣埸地下 E 舖
電話： 3520 2122
營業時間：星期一至六 7am - 8:30pm，星期日 8am - 7:30pm
備註： 冰心發售時間，九龍灣、新蒲崗及荃灣店由 11am 開始，元朗店 12nn 開始
↓↓【免費贏Rollink可摺疊行李箱或旅行Mini Bag】↓↓
↓ 立即分享旅行美食相↓
↓【限時搶】「KRACIE知育菓子」開心嘉年華 DIY糖果↓
↓ 日本夏日祭典特色！ /簡單好玩又食得！ ↓
