香港最後的銅匠 百年老字號炳記銅器宣布光榮結業

發佈: 2024.01.22
文: U Magazine

喺香港,一盤生意可以做上 20、30 年已經很了不起,上百年的老店應該十隻手指數得晒,想不到在繁忙的旺角,隱藏了一間百年老字號──炳記銅器,20 年代開業,現在由陸強才及陸樹才兩兄弟子承父業經營,幾十年來傳來嘹亮的叮叮噹噹打銅器聲音,但不久之後就會成為絕響。(原文刊於 2014 年 U Magazine)

text & edit│sieg photo│Paul

炳記銅器兩位匠人,兩人都已 80 多歲,都有意退下來,去年年底宣布結業,兩位老人家說賣光店裏的貨物就光榮結業,未有具體結業日期。作為香港最後一間手製銅器店,打銅手藝在香港應該成為絕響。

的確,近代香港人甫出生家中已用上不鏽鋼的鑊、水煲、剪刀、蒸架和湯煲,銅製器少之又少。但倒流到七十二家房客的五六十年代,不鏽鋼尚未通用,廚房客廳睡房裏用的物件統統都是銅製。銅業鼎盛,那時亦是這間百年老號最輝煌時代。

老闆陸強才當年還未跟哥哥陸樹才承繼父業,仍是𡃁仔一名的他由打製藥煲上的「蝦公仔」(即藥煲蓋頂弓形的指揪位置)開始,一做就是 60 多年。

「未有不鏽鋼之前,啲涼茶舖、藥舖、酒樓、住家、廟宇用好多銅器㗎,好似藥煲、水煲、爐鼎、門鉸櫃餃、大胡蘆形涼茶壺及打更用的銅鑼咁。家家戶戶都用銅,當時單係旺角銅器舖都有 5、6 間。」才叔說。

而家人人都用不鏽鋼,銅的好處無人比這位銅匠了解更多。「銅唔似不鏽鋼咁係合成嘅,完全天然,唔會有化學物質;而且好耐用,就算穿咗爛咗,其實可以焊返,買一件真係用一世㗎!」他
說。

不過,在不鏽鋼與大陸廉價機造銅器夾攻下,香港打銅的地方買少見了。這位 80 多歲的老人家應該是香港最後一批銅匠了。2014 年的訪問裏,才叔說:「高峰時呢度有 6、7 個熟手師傅,家吓式微啦,啲訂單都上晒國內,仲剩低我與另外 2 位師傅打銅,最後生嗰個都 60 歲啦,打銅又辛苦,人工又唔高,咁多年都無後生仔入行,而家我有一日做一日,希望做到無力氣為止。」記者記得,採訪當天是春夏之間,陸師傅揮動鎚仔打呀打呀,揮汗如雨,件件銅器真的有血有汗!

謙虛老實的才叔說銅業低微,但人手打造的銅器其實比五金多了份「匠心」。唔理黃銅定紅銅,都是由一片銅片開始,由平面打成立體,靠的是工匠一錘一錘地為銅片造形,不用模具,不用啤機,以人手打出幾近 3.14159 圓周率、六面均完全合符幾何學 90℃ 直角的方形器皿,少點美感手藝氣力耐性也沒有可能,水準係入博物館都得㗎!

我查過維基了,致力日本國內被政府確認的「人間国宝」金工部分就有 8 人,才叔兩兄弟作為香港絕對是值得尊敬的香港職人,辛苦兩位老人家守住這間百年字號,為香港傳承碩果僅存的打銅手藝,祝願才叔兄弟退休生活愉快。

舖頭既是零售點又是工場,經過便會聽到鏗鏘的打銅聲音。

老師傅正在打製涼茶舖用嘅銅製大胡蘆的下部,完美的弧形在沒有模具的輔助下師傅人手打造。

打銅所用的錘子有數以十種。

這個黑色的水煲其實是銅製的,是三、四十年代的日常家庭用品。

由黃銅片打出各種立體形狀的銅器,已不只是手藝,更是藝術。

記出品的銅器都會打上店子資料,細緻漂亮。

依這個「𠝹模」將銅片剪成像蝴蝶的形狀,再屈曲燒焊就可造成水煲壺嘴。

紅銅煲

這款煲子也是熱門產品,飲食界內不煮粥的師傅都會來找才叔訂製這銅煲,銅煲傳熱極快,最啱用來煮生滾粥。

紅銅水煲 

水煲是暢銷產品之一,在沒有機器輔助下,弧度完全,手工之作很是神奇。

紅銅煎鑊

不少有要求的西廚會請炳記打造銅煎鑊,手位或鑊子的厚度闊度也可以訂製。

【info】
炳記銅器
地址︰九龍油麻地咸美頓街 1 號

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more