煲仔飯天花板! 元朗車仔麵店最強出品 普洱茶煮香脆飯焦

發佈: 2024.02.09
文: U Magazine

天氣一涼,就會想吃熱辣辣的煲仔飯,本地土炮煲仔飯店百家爭鳴,各有招牌看家本領,造福吃貨們。在元朗的堅料,打正旗號以車仔麵店自居,但原來其臘味煲仔飯可說是煲仔飯天花板,吸引一眾嘴刁的高官明星入來幫襯!

text│onki photo│Jay

日賣 60 煲!最強臘味煲仔飯  

在元朗開業 11 年的堅料豬手車仔麵店,老闆堅叔曾在內地做皮革生意,是識食之人,吃遍大江南北又愛下廚,退休後決定開餐廳完成夢想。美味在乎新鮮是他的宗旨,堅叔每日到街市揀料,只選當造食材,晚市菜單日日轉款,雖然只得 3 款菜式,但一定是最當造新鮮。而煲仔飯、羊腩煲等菜式必需提早預約,晚市也有供應私房菜,依預算而寫菜單(每位 $300 起)。

入口脆香!普洱茶煮飯焦

沒寫在菜單上的臘味煲仔飯,全日供應,但必需提早半日預約。煲仔飯做法心思位多多,煮飯尤其有心機,講究地用泰國金鳳茉莉香米,新舊兩溝,米加入蒸完臘味的汁來浸米 30 分鐘,讓米粒充份吸收水份,米粒索盡臘味油香及水份,再以猛火煮到收水,避免米粒吸水過久,煮熟後過腍,唔單只飯底散發臘味油香,飯質仲好爽口煙韌。

煮好飯,就跟隨平常做煲仔飯般,加入購自上環名店的臘鴨、臘肉、膶腸和臘腸,不過心思位是肯花時間用慢火烘出完美飯焦。

「好食的煲仔飯極花時間處理及用心去睇火,收乾水慢火烘,飯焦才脆身不怕燶,一煲差不多 45 分鐘來完成。除了臘味以外,還可以加滑雞、排骨、黃鱔、田雞、肉餅、蟹等配料,你講得出,我做得到。」堅叔說。

粒粒分明的米飯有臘味油香,連豉油也不用下,「食到最後會加普洱茶及葱花來煮飯焦,厚身飯焦索盡茶香,入口脆香無苦味。」

普洱茶飯焦,做法跟廣東(順德、增城一帶)傳統將煲仔飯煮成「飯焦茶」做,茶香、米香、葱香交織,令本來麻甩煲仔飯多了份優雅。「堅料」自然多人賞識,旺起上來,巔峰期日賣 60 煲!

「時令」煮法車仔麵 人手拔毛燜豬手
招牌車仔麵大家亦不要錯過,配料約有 27 款,堅叔堅持咖喱汁都要因應不同食材而調配,「我在孟加拉住過兩年,覺得當地咖喱用的香料更有層次,辣度溫和,極適合用來做咖喱魚蛋及魷魚等車仔麵配菜。」

同樣受到網民追捧的豬手,人手逐條豬毛拔走,處理得乾乾淨淨後,再用秘製醬汁先燜豬腳尖後燜豬手,燜完仲要再焗,鹹香細滑。

臘味煲仔飯 $178 ( 2 人份,需預訂)
吸了臘味油香的米飯粒粒分明,米香濃郁,食落滋味;臘鴨肉質煙韌不死實,膶腸有酒香,臘肉沉香不過鹹,臘腸有油香,煲仔飯味融合臘味香,極為滋味。

用普洱茶煮過的飯焦,葱花來煮飯焦,葱花、米香、茶香煮至融成一起,非常美味。

 

羊腩煲 $350 (1 斤生羊肉分量,須預訂)

全年供應的羊腩煲,只用新鮮羊腩製作,出水斬件炒香再放入炸香的薑、香茅、八角及肉桂等香料醬汁燜足一小時,再焗至入味,肉質細嫩,要肥有肥,要瘦有瘦,入口有獨一無二的肉香。

豬手 $32 兩份
用皮厚肉嫩的巴西豬手,入口鹹香腍滑,極為惹味。可蘸自家製的辣油,辣度中等但帶有咖喱香。

豬腸 $16
豬腸每日朝早到肉檔入手新鮮貨,堅嬸親自花足 4、5 小時來除污汆水處理乾淨,沒有腥臊味道,毋須再調味,豬腸特別煙韌爽口。

咖喱魚蛋、豬皮、魷魚、蘿蔔油麵 $61
咖喱車仔麵之選,以香料味濃、辣度溫和的孟加拉咖哩粉,再因應食材而調至味道及濃稠度各異的咖哩汁,豬皮索盡咖喱極入味,魷魚爽脆彈牙,重香多於重辣。

牛肚、牛孖筋、柱侯牛腩、牛脷油麵 $74
牛王車仔麵之選,招牌柱侯牛腩用的是急凍的巴西牛坑腩,以十多款香料煮得入味鬆軟,鹹香帶甘,牛孖筋黏口起膠; 牛肚濃香有嚼頭,入口啖啖肉的牛脷,一碗麵食到千變萬化的口感。

 

【info】

堅料豬手車仔麵店
地址:元朗安良里 7號寶益樓地舖
電話:5618735
營業時間:11:30am - 9:30pm

 

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more