又有舖頭宣布結業，今次是銅鑼灣人氣燒烤店燒房焗，4 月 30 日是最後營業日。這間舖頭開到凌晨，食品高質有特色，高峰時期晚晚爆場。可惜近期遇上飲食業寒冬，老闆 Bowie 無奈在 facebook 宣布結業。經常幫襯或是一直慕名想來光顧的朋友，所餘的時間不多，要來就要快一點了！
text│Yan photo│Ken
舖頭最初於灣仔機利臣街的茶餐廳內經營，後來搬到銅鑼灣永光中心，然後再到跑馬地，現在選址謝斐道，一向不高調，卻有大量粉絲擁躉跟隨老闆 Bowie 轉移宵夜陣地。面對結業，老闆 Bowie 也最捨不得熟客。
唔少人形容這兒是「隱世高質燒烤店」，因為 Bowie 煮餸出晒名用料夠靚、夠落本。十多年前，Bowie 已經營運網上高級食材店，揀料奄尖。本地瀨尿蝦、奄仔蟹、大閘蟹必甜必爆膏，日本兵庫縣蠔、五花腩、澳洲羊架、紐西蘭一級肉眼扒，喺度食得的就保證優質高水準。
來店辣菜一定要吃，因為奄尖到痺的 Bowie 堅持採用 AA 級雀眼椒和印度鬼椒拼配的辣椒粉，說起有煙燻香和香料層次的印度鬼椒，坊間百多元一公斤已買到不錯的品質，但 Bowie 卻要買最 top 的 2,000 元一斤的。
燒房焗的辣唔講得笑，只有麻辣日本花螺屬於友善級別；熱賣的爆粗雞翼則是一吃着火，舌頭經歷活着又死去的刺激；最癲是阿媽都唔認得麵，辣度分 BB1 到 level 2，然後每加一個 level 加 $10，Level 1 第一口極香辣，忍不住吃下第二、三口，然後感覺到野火在口腔內蔓延，要不斷飲香蕉牛奶解辣，記者吃咗兩三口就宣布投降。
當然店內有辣有唔辣，最經典便有燒雞翼，雞翼以耐性加時間慢慢離火燒，燒出來皮脆肉滑充滿雞汁鮮香！必食推介還有蟹黃油撈蝦子麵，收 $168 卻落足蟹粉，而且採用本地永樂特濃蝦子麵，爽口足料。至於酒水，不妨請 Bowie 及他女友 Candy 推介，希望老闆好快調整好步伐，再次東山再起，讓大家重溫爆辣宵夜。
阿媽都唔認得麵 $68
望上去，以為只係加強激烈版的辛辣麵。入口唔講得笑，第一口香辣豐富有層次，極香口，忍唔住連吃幾啖後，由舌尖到五臟六腑有野火蔓延的感覺，食完仍活着真好！
有米瀨尿蝦 $198 200g
有米，即漁佬式海鮮友口中的多膏。店內隻隻本地瀨尿蝦保證有膏。啖啖肉又多膏的瀨尿蝦蘸上靚醋而不蘸豉油，更加鮮味無窮。
Bowie 會教客人拆瀨尿蝦，可整隻瀨尿蝦肉如金蟬脫殼一樣，完整無缺。
喪標粟米 $88
被形容為令人處於「愛於痛的邊緣」的喪標粟米，是店內最辣美食之一，用上 Bowie 重本入手 AA 級雀眼椒和印度鬼椒辣粉，歡迎越級挑戰。
爆粗雞翼 $88 串、鹽燒雞翼 $78 串
店內燒雞翼有辣有唔辣，燒製時間較長，但十分值得等。雞翼離火慢慢燒，皮脆肉嫩，極滋味。
蟹黃油撈蝦子麵 $168
蟹粉足足有 100g，毫不吝惜。而且用上本地永樂特濃蝦子麵，口感清爽，蟹油掛麵，啖啖都有大閘蟹肉蟹膏，令人好想再三回味。
甜品獲好評，款食不時轉變，除了卷蛋，還出現過巴斯克蛋糕、焦糖布旬和朱古力蛋糕等。
【info】
燒房焗
地址：灣仔謝斐道 313 號地舖
電話：9452 4949
營業時間：5pm - 2am（即日至 4 月 19 日午市時段亦開放）
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
↓【必收藏】最新深圳食買玩攻略！↓
↓ 大灣區一小時生活圈！最新打卡熱點／熱門美食等！↓
