早前位於深水埗的「御品·千之味」推出的三文魚放題極受歡迎，只需$88就可任食三文魚刺身、三文魚炒飯等日式料理。今次餐廳推出新優惠，$88就可任食原隻連殼甜蝦，加＄30更可升級任食鮮甜赤蝦。
深水埗「御品·千之味」由6月1日起推出$88甜蝦放題。
除Vip會員外，所有客人不設訂枱，另設加一服務費；不設分枱服務，必須全枱同時使用。
放題全日供應，90分鐘內以自助式任食原隻連殼甜蝦。
甜蝦頗大隻，味道鮮甜。
甜蝦放題設有「升級優惠 」，客人只要加$30就可以同時任食大大隻赤蝦及任飲汽水，但要注意升級優惠都必須全枱同時升級。
赤蝦不設自助形式，需要每次向店員下單。
赤蝦大隻，味道比甜蝦更鮮甜爽口。
有約廿款飲品可以任飲(只限升級放題)。
每日6點後；星期六、日及公眾假期設有「每位」最低消費$150。
「御品·千之味」同時供應90分鐘三文魚放題，$138食勻超過廿款三文魚料理，包括刺身、壽司等。
星期一至五6pm前$138/位，6pm後、星期六、日及公眾假期全日$158/位，另設加一服務費。
推薦火炙三文魚壽司，入口即化好滿足。
辣味三文魚軍艦微辣相當惹味，重口味人士可以試試。
親子三文魚手卷，三文魚子不腥，紫菜厚身不易腍。
熱食之選蒜香三文魚帶子炒飯，熱辣辣食到粒粒帶子，撈埋蟹籽一齊食口感十足。
三文魚頭調味不多，魚肉嫩滑，質素不錯。
御品·千之味
地點：深水埗荔枝角道390號地下C鋪
電話：3704-7177
