荃灣向來是美食集中地,港式小食、台式飲品、日本壽司、韓國炸雞等應有盡有,選擇眾多。除了在街頭掃街,荃灣其實還有不少性價比高的餐廳值得一試。大家可先到傳統茶居蓮香樓歎一盅兩件,品嚐各款懷舊點心,晚上再食個飽肚足料的巨型丼飯,然後直落食芋圓等台式甜品,保證滿足。今個週末不妨約屋企人或朋友來個荃灣美食一日遊吧~
1. 蓮香樓-懷舊點心
中環老字號茶樓蓮香樓在荃灣設有姊妹店,裝修和運作模式均仿照舊時茶居,並供應多款坊間茶樓少見的懷舊點心,如豬潤燒賣、金錢雞等,吸引到不少茶客捧場。
茶居有伙計推著點心車、在點心紙上蓋印,充滿昔日懷舊氣氛,感覺親切。
飲茶時可選用茶盅或茶壺。茶盅在坊間買少見少,相比起茶壺更能保留茶味,不怕越沖越淡。茶茗每位$13,免加一。
金錢雞 ($52)
金錢雞上層有叉燒和雞肝,下層有塊經糖和酒醃製過的「冰肉」肥豬肉,食落好香口,質地軟腍又有點黏口,口感豐富。
豬潤燒賣 ($28)
豬潤細滑,燒賣混入了豬肉、蝦肉和冬菇,味道香濃,還吸收了豬潤的香味。
百花釀魚肚 ($24)
選用原塊魚肚,魚肚大份足料,口感綿密,面層的蝦膠令味道更鮮甜。
* 客人需自行入座,要耐心等候入座啊~
2. 大丼屋 - 魚生丼+鰻魚丼
丼飯足料大份,當中以雜錦魚生丼和鰻魚丼最受食客歡迎,自問大食的朋友可以挑戰!
巨形富士山丼 ($188)
有加拿大海膽、築地拖羅、三文魚籽、蝦和松葉蟹肉絲,超豐富,多到快要滿瀉。
海膽好鮮甜,入口會慢慢溶化。
日式鰻魚丼 ($98)
鰻魚即叫即燒,豐腴肥美,富油香。
即叫即燒的鰻魚燒得微焦,令魚油滲出來,好香!
鰻魚外層微脆,豐腴肥美,富油香。
巨蝦天婦羅丼 ($88)
天婦羅即點即炸,連醬汁都是由師傅親自調製。蝦天婦羅炸得金黃香脆。
燒牛肉爆丼 ($88)
丼飯用上300G牛肉,份量十足!牛肉肉質嫰滑,牛味濃郁惹味,配上日本雞蛋食用,味道更豐富。
另外下午茶會送一份小食,相當划算,小編推介!
3. 叁茶陸飯 - 芋圓+珍珠奶茶
台灣菜一直深受港人歡迎,這間台式餐廳除了有肉燥飯、紅燒牛肉麵及鹽酥雞等台式招牌菜外,還有台式甜品和手搖台式飲品,款款都好吸引,令人垂涎欲滴。當中甜品是餐廳的主打之一,食飽飯不妨試試這店的芋圓和黑糖麻糬鬆餅,為一整天畫上完美的句號。
黑糖芋圓仙草凍2號 ($33)
芋圓有咬口,仙草滑捊捊,再配上紫米和綠豆,口感豐富。
蜂蜜黑糖麻糬鬆餅 ($72)
咬開入面有黑糖麻糬,口感煙韌,上面還有Q彈珍珠及雪糕,味道香甜。鬆餅頗為香脆。
由台灣人主理的台式手搖飲品也是餐廳一大招牌,每壺茶也有不同溫度控制以保持茶的品質與香味,沖調過程一絲不苟。
招牌黑糖珍珠炭燒烏龍奶茶 ($28)
京都抹茶珍珠拿鐵 ($38)