雖然香港人一年365日都無停止過食火鍋,但到了秋冬這個打邊爐季節就特別想食,隨時一星期有3、4晚都去打邊爐,不過打邊爐烚下烚下,一唔覺意就會食多了,今次小編就整理了15款火鍋配料的熱量,一齊睇下邊款最高卡路里!
15. 鴨血
食麻辣火鍋當然要食鴨血,台灣有些火鍋店更有得任食鴨血,原來鴨血熱量不是很高,每100克只有28.8千卡,不過配麻辣火鍋就卡路里飆升,不要一次吃太多啊!
14. 椰菜
打邊爐點都要食菜!椰菜每150克有33千卡,亦是健康之選,不過最好就一開始食,因為蔬菜非常吸油,所以到最後才放落鍋,吃下的全都是油喔!
13. 金針菇
另一個火鍋常客金針菇每100克41千卡,同樣是蔬菜,最好一開始食先。
12. 雞蛋
好多人都鍾意打隻雞蛋落火鍋到食,一隻55克的雞蛋就有75千卡,不過其實打了落火鍋都散哂,所以照食啦!
11. 草蝦
打邊爐又點少得海鮮,8隻草蝦(約104克)都只係102千卡,如果有人幫手剝蝦殼就更好。
10. 蟹籽丸
蟹籽丸1粒15克左右,5粒就已經115千卡,食幾粒好了!
9. 魚皮餃
屋企打邊爐成日都會見到成盒魚皮餃,原來5隻都已經115千卡。
8. 粟米
打邊爐去到最尾一定要食條粟米先叫完滿,2條粟米220克都只是142千卡,平時食一小件,不用擔心啦!
7. 花枝丸
花枝丸每粒25克左右,食5粒就要225千卡,仲多過碗飯!
6. 貢丸
貢丸每粒20克,食5粒就足足有245千卡,食少少就夠,留返點quota食多幾款丸。
5. 烏冬
大食的朋友打邊爐點都要食個麵先夠!烏冬一個200克就有295千卡,雖然多過一碗飯,但食一包不是太過份啊。
4. 出前一丁
比起烏冬,出前一丁一包100克都已經457千卡,即刻覺得烏冬其實不是太邪惡!
3. 梅花豬肉片
梅花豬肉片8片160克左右,原來已經要470千卡。
2. 牛五花
牛五花8片160克就已有518千卡,不過打邊爐點可以不吃牛!
1. 五花肉片
見到五花肉都知肥,8片160克原來已經有614千卡,食少少好喇!
除了火鍋配料外,也要留意湯底,以1200毫升計算,麻辣湯底已經有1628千卡,昆布湯底就只有30千卡,所以減肥時可以選擇較清淡的湯底,同樣可以烚下烚下!
資料來源:台灣衛生福利部國民健康署