【K11 MUSEA餐廳】尖沙咀商場K11 MUSEA正式開幕！全新美食廣場多間小食店進駐

最Hit食訊

發佈: 2019.09.04

文: YY

尖沙咀K11 MUSEA於上星期(8月26日)正式開幕，有香港首間MOMA Design Store、UA旗艦影院，亦有多間過江龍餐廳同時進駐，包括英國Fortnum & Mason、日本Afternoon Tea等人氣品牌。不過除了有多間新餐廳於商場插旗外，其實K11 MUSEA新商場亦有不少小食店，今日就一齊睇睇B2層美食廣場有甚麼不同美食啦！

K11 MUSEA樓高10層，一共有70多個本地及國際品牌食肆餐飲，而其中不少食店都會進駐B2層，B2層除了有超級市場外，更有美食廣場Food Playground及小食、甜品區Taste Chamber，今次就同大家整理10間小食店，下次去尖沙咀都可以入商場掃街～

↓點擊圖片放大↓

1. 京都抹茶焙茶專門店 (即將開業)

由日本茶農開設的手沖茶飲店「本茶」去年曾經於銅鑼灣開設期間限定店，今年就決定進駐K11 MUSEA，主打抹茶、焙茶及玄米，以自家烘焙茶粉製作飲品，茶香特出。另外亦有蕨餅、雪糕等甜品，鍾意品茶的朋友一定要去試試！

↓點擊圖片放大↓

本茶

地址：K11 MUSEA B2層B201 Unit 34

2. 魚糕專門店

韓國人氣魚糕專門店Samjin Amook亦於香港開分店，有多款魚糕，自助形式，夾完排隊付錢，更有熱辣辣的傳統魚糕及香港限定的麻辣口味，鍾意魚糕的朋友要去朝聖喇！

↓點擊圖片放大↓

Samjin Amook Express

地址：K11 Musea B2層B201 Unit 13

營業時間：早上11時至晚上10時

3. 日系文青風茶飲店

於尖沙咀、太古城及灣仔都有分店的SP Flower & Tea room主打茶花美食，最近就於K11 MUSEA開設全新概念店Dialogue，以上等東方茶、香草茶飲，配搭茶點心、菓子、茶禮，茶控一定要去打卡！

↓點擊圖片放大↓

Dialogue 茶日子

地址：K11 Musea B2層B201 Unit 19-20

電話：36195869

4. 韓式炸雞

平時去餐廳食炸雞多數都要幾個人share先食到，不過呢間韓式小食店除了有炸雞桶外，亦有一人份的無骨炸雞、年糕串。

↓點擊圖片放大↓

한 Chicken & Snack

地址：K11 Musea B2層B201 Unit 9-10

營業時間：早上11時至晚上10時

5. 巴黎人氣牛角包(即將開業)

來自法國的烘焙店Gontran Cherrier有巴黎最佳牛角包的美譽，有超過80款烘焙麵包、甜品、鹹點，招牌牛角包亦有多款口味，官方亦指香港會有限定產品，各位鍾意牛角包的朋友就要密切留意喇！

↓點擊圖片放大↓

Gontran Cherrier

地址：K11 Musea B2層B205-B207

6. 韓式紫菜飯卷

鍾意食紫菜包飯的朋友就可以試下呢間韓式食店，除了有傳統韓式飯卷外，亦有芝士泡菜牛肉飯卷、雞肉飯卷等，另外更有韓式拌飯同人參雞粥！

↓點擊圖片放大↓

Soul Jook

地址：K11 Musea B2層Food Playground

7. 雞蛋仔專門店

商場除了有不同的貴價美食外，亦有香港街頭美食雞蛋仔小食店，雞蛋仔有不同口味，更可以加不同醬汁及配料，另外有格仔餅棒棒，拎住食超方便！

BubbleBee

地址：K11 Musea B2層Food Playground

8. 智能茶飲店

茶飲店店員沖製的飲品飲得多，但機械手搖茶飲你又試過未？今次K11 MUSEA更引入首創的AI人工智能茶飲品牌Robotea，結合現代科學等元素，讓機械手臂自動調配飲品。Robotea主打以果醬及花茶沖製的果茶，另外亦有雪糕供應，包括早前大熱的大白兔糖味雪糕都食到！

Robotea

地址：K11 Musea B2層B201 Unit 30

9. 叉燒刈包

鍾意食台灣刈包的朋友就可以試試這間中日fusion的PIGGY SMOKE，主打叉燒刈包，有不同款式，另外更有溫泉蛋叉燒飯！

PIGGY SMOKE

地址：K11 Musea B2層Food Playground

10. 韓國牛奶雪糕(即將開業)

韓國雪糕品牌百味堂亦會於K11 MUSEA開設旗艦店，一樣可以食到百味堂的經典甜品，9月更有期間限定的山梨縣白桃牛奶雪糕。

↓點擊圖片放大↓

百味堂

地址：K11 Musea B2層B225A

K11 MUSEA的B2美食區還有多間食店，如牛油果專門店Avobar、Bears & Friends亞洲首間分店，熟成牛扒房bong pro-dryaging、泰式船麵Bot Noodle、親子餐廳Donut Cafe、咖啡店GEORGE COFFEE、中式炒意粉Italio Wok魚々楽、刺身壽司TOTORAKU、素食漢堡SUN & ROOTS、Future Bar by Green Common等，大家約埋朋友一齊去覓食啦！

↓點擊圖片放大↓