新冠肺炎疫情繼續蔓延，在疫情高峰期，市民都應盡量留在家中抗疫，不少人都會選擇叫外賣在家中用餐。雖然無得出街玩，不過叫外賣亦一樣可以搞搞新意思，自己做出不同配搭，有網民就曾分享譚仔的另類食法，齊齊集思廣益製作「譚仔secret menu」！
譚仔相信是大家最愛的平民美食之一，不同辣度的米線、土匪雞翼、尖椒皮蛋，每次去唔駛睇menu都可以直接叫到。但你又知唔知譚仔原來都有secret menu？米爽、走湯你又試過未？早前連登就有網友開post「一人一個食譚仔嘅另類食法」，引來不少人討論自己創作的「譚仔secret menu」，一齊睇下有冇一款你試過！
外賣火鍋
不少網民都表示想去譚仔打邊爐，雖然譚仔及譚仔三哥目前都未有堂食火鍋，不過三哥就曾出post建議大家外賣自取，用三哥米線的湯底打邊爐，亦有不少網民曾試過表示正！
小食+淨米
譚仔除了麻辣米線外，另一賣點就是不同的小食，土匪雞翼、蒜泥白肉，不過叫碗「墨演懶肉十小辣」再加其他小食，埋單閒閒地都50、60蚊！呢個時候就可以叫淨米再加其他小食，不過淨米一向都只可以選擇清湯，所以就要叫埋麻辣小食，如蒜泥白肉，然後再倒麻辣汁到湯中，自製一碗麻辣湯米線。
米爽
少米減$1就聽過，米爽你又聽過未？有網友指原來譚仔可以叫「米爽」，食落更有咬口，平時嫌米線腍的朋友可以試試。不過就要小心未必間間分店質素都一樣，有網民試過叫「米爽」，米線硬到好似無煮過一樣！
撈米線
有不少網民都表示會叫「走湯」，原來是想吃撈米線，而撈米線的醬汁就可以叫跟餐的炸醬或者蒜泥白肉、麻辣豬耳的辣汁。
走米線
走韭芽就正常，走米線？原來之前曾有網民叫走米線，網民表示餸菜會增多。唔知幾時譚仔會有淨餸這個選擇呢？
你又試過叫咩「secret menu」呢？
唔止secret menu，其實譚仔亦有secret spot，早前情人節譚仔三哥Facebook專頁推出辣味朱古力，更推介一個有「無敵大海景」的分店，更笑言不設訂座，等疫情完結就去睇靚景歎米線！
