「Do Do Mi So So...」一聽到《藍色多瑙河》熟悉的旋律，就知道有雪糕車在附近。提起集體回憶，又點少得富豪雪糕車，放學行街見到神出鬼沒的雪糕車，一定要買返杯軟雪糕、珍寶橙冰又或者蓮花杯，但講到雪糕車，你除了知道它經常出沒的地點外，你又對它有多了解？
富豪雪糕Mister Softee是在1956年由一對曾於軟雪糕機公司上班的美國人兄弟發明，到1969年再由三名港人取得特許經營權，將雪糕車帶入香港。雪糕車一開始引入香港時吸引了大批顧客，數年間已增至14部，可是政府在1978年停發流動小販牌，令這14部雪糕車成為「絕版」。今次就同大家數數7個富豪雪糕車「你不知道的事」，一齊回憶一下童年～
1. 點解軟雪糕得一款口味？
美國Mister Softee有不同款式口味，而且有不同配料選擇，但香港就只有一款口味軟雪糕選擇。有傳當年港英政府對雪糕車有嚴格規管，雪糕車只能安裝一部軟雪糕機，所以到現在都只有一款口味。
2. 新年有限定口味？
雖然話雪糕車只有一款口味軟雪糕，不過原來每逢新年，都會換成士多啤梨口味軟雪糕，大家又有冇試過？
3. 原來有雪糕小姐？
想當年，富豪雪糕車一杯軟雪糕只售$0.5，生意極好，除了有雪糕車外，聽講部分更有雪糕小姐隨車賣雪糕，小編就無見過，唔知有冇人可以證實呢個都市傳說呢？
4. 點解用《藍色多瑙河》？
美國Mister Softee為吸引顧客，特意作了一首專屬的主題曲，不斷唱著品牌名稱，十分洗腦。來到香港就換成《藍色多瑙河》，據說係因為當時很多音樂盒都用這首圓舞曲，所以才選擇將這首歌變為雪糕車的主題音樂。
5. 有得包車開Party？
有部分網民都指曾經試過租富豪雪糕車，可以租成架車連司機，有網民就話當年中學班主任就曾租雪糕車，停在學校俾同學任食！
6. 有得參觀總部？
可樂廠、益力多廠就去得多，原來富豪雪糕廠都可以參觀！位於火炭的富豪雪糕廠相信有不少人會經過，有網民表示參觀雪糕廠可以上富豪雪糕車，更可以試唧雪糕～
7. 雪糕車改名？
以往香港的雪糕車都源用美國富豪雪糕Mister Softee的名字，不過到2010年代初，美國Mister Softee收回香港雪糕車的特許經營權，香港的富豪雪糕英文名亦改為Mobile Softee。
資料來源：LIHKG、Mister Softee
圖片來源：FB@富豪雪糕車、Twitter@Mister Softee
