【火炭美食】38年老字號 碩果僅存  香港手做馬仔

38年老字號 碩果僅存 香港手做馬仔

發佈: 2021.06.03
文: U Magazine

text│TY photo│Kee

馬仔是兒時的美好回憶,舊日不少餅店都會一板板地擺賣。店內現做的當然特別新鮮鬆脆、蜜甜牽絲,在這個速食年代已近乎絕迹,但竟然剩下一間唐餅廠仍然手製馬仔。「手做口感梗係唔同啲,好食好多。」38 年老字號順香園負責人馬先生說。

早上未夠 6 點,順香園工場已傳來撻麵糰的聲音,幾位師傅埋頭苦幹製作傳統唐餅。其中一位師傅躲在角落與碩大油鑊為伴。「得我要用炸鑊炸馬仔咋嘛!」草蜢是順香園的馬仔師傅,可能也是香港唯一的馬仔師傅,他在這裏工作逾廿五載,馬仔佔據了他的大半生。

鮮雞蛋、高筋粉、發酵粉(泡打粉)就是馬仔的主要材料。「我哋的馬仔無落防腐劑、添加劑,做出嚟口感唔腍,新鮮鬆脆,是昔日馬仔應有的口感。」草蜢師傅解釋道。做馬仔好辛苦,麵糰近 40 公斤重,重覆搬到壓麵機壓至 1cm 厚,師傅手執大菜刀把麵糰切到只有紅豆的大小。

記者第一次採訪馬仔的製作,油炸部分很神奇,粉粒碰到油,不消幾秒便膨脹成如黃豆大小的金黃脆粒。炸作完成,要拌上糖漿。將「金粒」和糖漿融合極考功夫,糖漿好稠厚,師傅真的要出盡力氣、快手快腳炒,太慢糖漿凝固咗就炒唔勻。

馬仔入模定形,高手會壓至無崩口、少縫隙。撒上芝麻、切成小件,一盤新鮮的馬仔就完成了!原來仲有少量餅家向順香園攞貨,原盤手切賣給街坊;但大部分銷售點會發售獨立包裝的。記者送個貼士畀老饕,直接踩上工場啦,批發價 $4.5 就食到草蜢師傅手勢,仲可順手以買埋老婆餅、南乳燒餅、嚤囉酥等老餅㖭。

【info】
順香園餅家
地址:火炭山尾街 23-25 號宇宙工業中心 4 樓 B 座
電話:2605 6181
營業時間:星期一至六 9am-5:30pm,星期日休息

集烤焗及氣炸功能於一身

↓↓配合17公升大容量機身↓↓


↓↓即睇最新電子書【U Flip Vol.06】↓↓

酒店餐飲及Staycation優惠任你揀

more