街坊餅店 韓國麵粉雞批

發佈: 2021.07.07
文: U Magazine

text│Vera photo│May

 

大角咀富榮花園有間迄立了 20 年的街坊餅店,年前店主退休,轉手予入行 25 年的包點師傅阿光。光師傅曾跟老師傅學藝,既會做新式包點,也擅長做傳統唐餅,做街訪生意,麵包以平、靚、正取勝,照顧到一班小孩子以至嬸嬸伯伯的街坊胃口。

「我想畀班街坊大眾化價錢都能食到高質素的包點,亦因為街坊街里,我哋出品無添加,少油少糖。」店主光師傅說。他接手餅店後,不計成本,所有麵包轉用日本麵粉製作,不同港式麵包店常用的美國粉,甚至下欄一點的國內粉,日本粉筋度較低,做出來的麵包口感寧舍鬆軟;蛋糕同唐餅改用韓國麵粉,焗出來的成品口感會較細緻柔滑,少了傳統唐餅的乾身粗嚡。

來光顧,不能不吃雞批,九蚊雞一件的雞批,皮特別香,完全無油羶味道,住得耐的街坊最識貨,半打半打咁掃走。雞批皮用比一般麵粉貴 3 成多的韓國麵粉做,口感特別幼細,牛油餅皮搓出來鬆化但不鬆散,幼滑不刮口。

光師傅反反覆覆來回以人手陰柔之力搓餅皮,不會有半點死實。爆餡的雞肉,是着重健康的光師傅預先將雞肉去皮才切粒,用淡奶、淡忌廉自家調較白汁煮,洋葱也另外炒到甜味盡出,跟攪到似雞蓉的版本比,口感不能同日而語。雞批多餡到件件脹卜卜,一出爐就有街坊搶。

麵包店前舖後工房,麵包按流量即製即焗密密出爐,不過雞批每日分兩次出爐,每次少量製作,賣不完就丟掉不留過夜。

【info】
家家頌餅店
地址:大角咀富榮花園 11 號地下
電話:2175 8832
營業時間:6am - 9pm

↓【送機票✈️】分享旅行靚相 贏免費機票↓

↓ 請您免費飛轉日/韓/泰!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more