偽出走曼谷! 屯門泰國香蕉煎餅檔

發佈: 2021.09.13
文: U Magazine

text│sieg photo│Kuen

好耐好耐無去曼谷啦,好想剷落 Silom 是隆夜市,狂吃香蕉煎餅、飲手標奶茶,再落去 Thong Lor 通羅區間水果店買芒果糯米飯……無得飛,唯有興奮地搭程屯馬線去 Chi Lok 啦,屯門置樂呀!這店有齊以上泰國小食可以幫你止住咳。

如果雞蛋仔代表香港,香蕉煎餅一定係泰國國民街頭小食,最經典係香蕉朱古力,或Nuttella 榛子醬口味,但這店將口味做得更多姿多采,上述的經典口味有!還新加了 honey mustard、蜜糖、粗粒花生醬、芝士榴槤,連配芝士火腿菠
蘿、芝士肉鬆的鹹食口味都有,仲有一款無香蕉,但加入紫薯蓉的創新口味。

唔敢講到這份煎餅天花龍鳳,但敢講用料係唔錯嘅,唔用 cheap cheap 香蕉,只用地捫,生熟度揀過,剛熟帶少許青,不會遇熱就融鬼晒,加熱後像果蓉、保持黏軟少少爽的口感,自己睇圖,看看煎餅中間香蕉蓉的狀態,沒吹水的!一份用上 3/4 條大蕉或 1 隻小蕉,散發濃濃蕉香,鍾意食蕉嘅一定無投訴。香蕉以外,其他餡料如馬拉 D24 榴槤、車打芝士及 Mozzarella 水牛芝士,食材質素算係超額完成。

真章還有那塊油酥煎餅,師傅私心研發,因為這位泰國通太愛吃當地的香蕉煎餅,配方都是麵粉、蛋同牛油,麵糰做得油潤有筋度,會拉至如上圖中的大小,煎起來夠薄,熱辣辣吃酥脆夠薄,略為擱涼,又多了份煙韌度。師傅話無秘方,落足牛油發酵、夠就做到,狠心以大量牛油低溫慢煎,煎餅拎上手隔住紙托都感覺到散發熱氣,口感輕脆,食落唔會一口油,老實講水準比泰國木頭車賣的好。

貫徹舖頭足料的做法,店內芒果類甜品,如糯米飯同芒椰奶西有驚喜。唔用過甜的呂宋芒,改用高級、芒味軟清甜有花香的台灣愛文芒,前者即叫即製,糯米不經雪藏特別新鮮軟、芒果即切,無氧化變黑;後者堅揪足料,一杯用足 1 個芒果,芒果幾濃郁?你話呢?一份煎餅配芒椰奶西,人飛唔到,至少個胃感受到曼谷呀……自我陶醉下囉。

【info】
泰小子
地址:屯門青河坊 3 號利寶商場地下 3 號舖
電話:3488 0827
營業時間:12nn - 9pm

同場加映:
【搵食熱話】銅鑼灣三層高精品超市旗艦店

↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more