大南街夏威夷 Poke Bowl 勁飽!大堆頭魚生飯

發佈: 2021.11.08
文: U Magazine

text│Sakura

大南街一向是文青新勝地,以咖啡店為主,蒲 cafe 蒲到悶,終於有小店破局了,賣中上環勁流行的夏威夷魚生飯 poke bowl,舖面設計都幾文青,老闆 Jason 曾從事設計工作,這兒不同 poke bowl 店那種快餐店設計,加咗啲日本味,採訪時就有不少潮人在打躉。

「大南街堅係『文青』,好有藝術氣息,遊人質素好好,仲有唔少鬼佬喺度 chill,我試過行去隔離街,個感覺完全唔一樣,所以我一定在這裏開舖。」Jason 說。他特別保留門外那個上手店舖、有 65 年歷史的「裕昌號」招牌,就證明他對大南街的熱愛。

Poke bowl 夏威夷蓋飯近年好 hit,這店落戶深水埗,價錢比中環平少少,但分量卻超越中上環那些 poke 店,碗碗大大份,頗有震撼感!供應 5 款 bowl,亦可以好似車仔麵咁自由搭配。蓋飯配料多達 20 多款,如牛油果、鮮蟹肉、三文魚子、麻醬豆腐、青瓜、酸蘿蔔等,而自家製醬汁則有 5 款,分別是鰹魚醬油、蜜糖芥末醬、辛味蛋黃醬、果仁醬和山葵乳酪醬,即叫即製,poke bowl 上枱,配料推到成座山咁高,好驚自己食唔晒!

香港人個個鍾意吃三文魚,故特別推介 OHANA,三文魚做膽,配櫻桃番茄、青瓜、粟米跟沙律菜,再 mix 埋自家蜜糖芥末醬,灑上芝麻和果仁,色彩繽紛,賣相吸引,啖啖清新!記者私心推薦 NALU 八爪魚蓋飯,八爪魚爽彈脆身,加埋皇帝蟹棒配以辛味蛋黃醬,海鮮味相當醒胃,坊間也少見。

Jason 仲幾有誠意,多款特調果汁會附上自家製風乾果肉片,例如菠蘿、香橙和蘋果,須花上 10 小時風乾而成,除了有裝飾作用,更有天然增甜效果,飲一啖果汁呷一口果乾,嚟大南街終於唔使飲咖啡咁悶了。

ONO $98(上)、OHANA $98
上面那款配料有三文魚、青瓜、雞蛋絲、皇帝蟹棒跟壽司飯,配果仁醬和芝麻,魚肉加上濃郁果仁醬,口感細膩。下面那款以三文魚為主菜,混合櫻桃番茄青瓜等,配蜜糖芥末醬、芝麻和果仁,色彩豐富。

808 $108
以吞拿魚做主菜,配上枝仁豆、三文魚子、雜菌香菇、和式青葱、沙律菜跟壽司飯,加入山葵乳酪醬、芝麻和木魚絲,吞拿魚肉質滑溜,帶三文魚子鹹香。

大南街夏威夷 Poke Bowl 勁飽!大堆頭魚生飯

紅火龍果汁 $38、冷壓菠蘿汁 $38
前者味道清新帶甜,有清爽的火龍果粒;後者果香味濃,香甜可口。

大南街夏威夷 Poke Bowl 勁飽!大堆頭魚生飯

梅凍番茄 $38
番茄肉鮮多汁,配上酸甜梅子,好 refreshing!

黃金蟹卷 $68
蟹腳棒入口酥脆,食到蟹肉鮮甜,配上沙律乳酪醬。

大南街夏威夷 Poke Bowl 勁飽!大堆頭魚生飯

中上環的 poke bowl 店不少都是快餐形式的,但這裏裝修有文青味,還設舒適的座位,歎夏威夷魚生飯特別 chill。

大南街夏威夷 Poke Bowl 勁飽!大堆頭魚生飯

餐廳裝修走小清新路綫,樓底高,以簡約木紋為主,頗有文青味。

【info】
Poke Go
地址:深水埗大南街 211 號地舖
電話:3563 8137
營業時間:11:30am - 10pm

同場加映:
【搵食熱話】最平 $499 位!狂食蟹 + 海鮮 BUFFET

more