70 年老字號 強記重開 最強糯米飯 / 砂鍋滑雞粥

發佈: 2022.01.18
文: U Magazine

text│Sakura
photo│Kee

在灣仔,有 70 年歷史的糯米飯名店強記早前結業,令一眾 fans 好失望,以為再吃不到這店的糯米飯,原來最近他們悄悄在同區重開。

強記憑一碗熱辣辣的糯米飯得到米芝蓮推介的加持。第一代店主老吳生 1951 年,推木頭車賣糯米飯,入舖後仍然保留了一架走鬼車賣糯米飯,連續 6 年獲米芝蓮殊榮,堪稱地表最強糯米飯。

人人追求生炒糯米飯,但平民走鬼檔版,做法無咁 fine,但卻有種街頭特色。強記一直用蒸煮方法炮製糯米飯,比鑊氣生炒嘅,糯米煙韌中更略帶軟綿、蒸氣直冒、熱騰騰,嚴冬裏吃,特別有feel。

「整糯米飯每個程序都唔可以錯,由揀選食材、浸米、蒸飯、炒臘味,每個步驟都不可有差錯,而浸米技巧更是我自己研究,先至做出穩定的味道。」第二代老闆阿細說。

多年來一直選用泰國頂級糯米,新米溝舊米,咁先有飯香、又有口感。其中浸米一環是美味關鍵,阿細說新米和舊米略有不同浸法,不過最重要是睇天做人!夏天,水比較溫暖,浸過的米會軟身啲,浸 1 小時就夠;到冬天,水較冷,要浸多一、兩小時來keep住受水程度,這個小秘訣能浸出有彈性、帶黏度,粒粒分明唔糊腍的糯米。

「我唔相信腐朽化神奇!無好的食材,點都整唔到好食糯米飯!」訪問中阿細不斷強調。品嘗這碗臘味糯米飯,會發現臘腸有肉香、不過肥、也不過瘦,膶腸出色,肝味甘香明顯,米飯也滲滿臘味油香,原來揼本用本地臘腸、潤腸,蝦米、冬菇都係一級貨,非常入味帶鮮香。

蒸飯前鋪上臘腸和潤腸,令臘腸的油香滲透落飯中,令到糯米飯又香又滑又光令,用不鏽鋼盤蒸 20-25 分鐘,隨後再放上經爆炒的臘味、冬菇和蝦米焗透。淋上自家製豉油,灑上葱花,一碗熱騰騰糯米飯,邊吃邊暖在心!

訪問當天,舖未開門已大排長龍,高峰時期日賣過 2,000 碗,每日用上過百斤糯米,相當大人氣,店裏的招牌美食如粥品、糖水一樣有供應,可以食返這老號的滋味,實在太高興了。

-----------------------------------------
鴛鴦腸雜錦臘味糯米飯 $63
小食店的糯米飯出名足料,有齊臘腸、膶腸和雜錦臘味,臘腸出色,6分瘦、4分肥,一咬有「肉地」,又滲了油香;膶腸腸衣脆薄,口感油潤,肝味甘香,均為本地貨,每啖飯都有冬菇碎及蝦米粒。

強記的糯米飯食落軟糯彈牙,用蒸煮方法炮製,粒粒分明,唔會蒸到又腍又黏爛。最正滲滿臘味味道,銷魂到追住吃。

70 年老字號 強記重開 最強糯米飯 / 砂鍋滑雞粥

第二代老闆 吳少峰(阿細)
日日朝早 7:30am 做到 11pm 無停手,糯米飯每個工序鑽研到極致,參考爸爸做法再加以改良。

70 年老字號 強記重開 最強糯米飯 / 砂鍋滑雞粥

糯米飯索滿臘腸的油香,再淋上自家製豉油攪勻,記者最鍾意強記豉油偏向淡口,不會過鹹搶去糯米與臘味的香味!

爆炒後的臘味、蝦米和冬菇,會以自家製豉油浸透,入味非常。

70 年老字號 強記重開 最強糯米飯 / 砂鍋滑雞粥

砂鍋滑雞粥 $46
除了糯米飯,砂鍋粥都是店家另一招牌,每日開舖前 3 小時準備粥底,新舖更推出滑雞粥,加入雞油熬煮而成,粥底綿滑。

70 年老字號 強記重開 最強糯米飯 / 砂鍋滑雞粥

新舖環境乾淨企理夠闊落,街坊們幫襯終於唔使日灑雨淋了!

舊鋪在灣仔馬師道,店子細細,但糯米飯香引死人,所以地方簡陋點,也大把人幫襯。

70 年老字號 強記重開 最強糯米飯 / 砂鍋滑雞粥

【info】
強記美食
地址:灣仔駱克道 406 號地舖
電話:2572 5207
營業時間:12nn - 10pm
備註:營業時間按防疫政策而有變動

more