集體回憶!史蜜夫先生你好嗎?
【工展會2018】一連24日工展會開鑼 10款精選美食率先睇!

集體回憶!史蜜夫先生你好嗎?

發佈時間: 2016.08.03
  • 1,000次
    分享

史蜜夫糖係唔少人嘅甜蜜回憶,原來糖果廠而家仲喺香港生產。呢間全港碩果僅存的本地糖果廠,就在牛頭角一座工廠內。方家三兄弟每天都努力打理糖果廠,但見三人輕輕鬆鬆,無乜壓力。「都做咗咁多年,整糖方法都係差不多,最緊要仲有人想食。」講得輕鬆,其實夏天工廠好鬼熱,但人情味搭夠,到今時今日仲會包伙食。


咪以為造糖廠房就幽幽暗暗,四千呎大的工廠好乾淨整齊。

舊時嘅本土糖果廠,有發達糖、甄沾記椰子糖、甄誠記椰子糖、嘉頓利是糖等等,有的已將廠房北移,好似史蜜夫這種規模的糖果廠已難找另一間。「除咗嘉頓,我都諗唔到其他喇。」史蜜夫最有名的是牛奶鳥結糖橙味軟糖蜜瓜味軟糖,除咗懷舊包裝,用料和生產工序都同舊時一樣咁老實,好似橙味軟糖就用大菜、粟膠、砂糖、橙味香料和水製造,材料全是來佬貨,加上全人手生產,做出來的糖晶瑩剔透又煙韌,非國貨可比。


曾在工展會一舉成名的橙味軟糖($13),有清新橙香味又晶瑩剔透。


密瓜味軟糖($13)都係代表作。


鮮味雜果軟糖 $14


牛奶鳥結糖($16)都係史密夫出產明星糖,奶味夠濃花生夠香。

方家三兄弟是糖果廠的第二代掌門人,父親是才第一代史蜜夫先生,當年在筲箕灣村屋家中作山寨廠做鳥結糖,60 年代在旺角通菜街頂咗一間清盤的史密路士糖果廠,再改名史蜜夫繼續經營,78 年搬到現址。方爸爸曾推出經典橙花軟糖參加工展會,大受歡迎,還外銷到阿拉伯地區,80 年代內地改革開放還暢銷內地,生意超好。



透明嘅軟糖以人手製造,一盤盤鋪滿鐵盤。


牛奶鳥結糖紙入貨要向外國訂購,但要訂一定數量才肯落單;至於廠房機器已用幾十年,已甚少師傅懂得維修,平日都是三兄弟自己修理。


鳥結糖水果硬糖等都有使用機器協助生產,惟獨軟糖因機切效果不好,仍然全人手造。


橙味軟糖最後一個步驟,人手包裝密封後就完成。


方氏兩兄弟

一日最衰都係 97 ,內地收重稅打擊入口食品,令這家有逾 60 年歷史的糖果廠風光不再。但,獅子山精神咪就係盡力做,咪洩氣,見到已到退休年齡嘅兄弟班,每日保持好心情做靚糖,外面大風大雨,who cares?



史蜜夫糖果廠
地址:觀塘偉業街 116 聯邦工業大廈 9 樓
電話:2341 3013
備註:如想親身到廠買糖,需最少買 10 包;營業時間不定,最好預先致電查詢。糖果在部分小型超市如家興、得寶及士多,么鳳、陳意齋都可買到。

歡迎你 like 我哋 U Food Facebook Page / U Food Instagram ,取得我哋更新更快嘅資訊!

歡迎你 like 我哋 U Food Facebook Page / U Food Instagram ,取得我哋更新更快嘅資訊!

免費登記成為U Lifestyle 會員
即時接收最新資訊並盡享獨家優惠

 
【工展會2018】一連24日工展會開鑼 10款精選美食率先睇!

免費登記成為U Lifestyle 會員
即時接收最新資訊並盡享獨家優惠

more