開爐即打！送上門火鍋懶人包

最Hit食訊

發佈: 2016.11.28

文:

一網打盡乜料都齊！│ Fresh to Go │
網購食物唔止訂生蠔、三文魚喇，成餐火鍋都可以上網買到，仲體貼到送埋上門畀你。Fresh To Go 成立 5 年愈做愈有規模，BBQ、火鍋料、湯料包、家常小菜、坐月食療、BB 食物等都有得揀。對於一年四季都要打邊爐嘅你同我，最吸引嘅梗係火鍋配料。

Fresh To Go 的「回家打邊爐」系列總共有 12 種食物類型、接近 200 款食材選擇。淨係牛肉都有本地、加拿大、美國 3 地選擇，多到唔知揀乜好！最正是所有火鍋配料都是「一撕即煮」，即係無需再清洗、一打開個包裝就可以即食！要落柯打，只要喺 Fresh To Go 網頁揀選食材，於每日 11am 時前落單，即日 4pm 至 7pm 就可以送到家中，送貨前 30 分鐘仲會有人打電確定送貨地址，make sure 有人接收先送貨，以保質素，好貼心。

食物會以保溫袋載好，入面再放有一大袋冰保冷。

金屋藏嬌鍋 $268

湯底有 15 款選擇，大路的有皮蛋芫茜、沙嗲、椰子嘉美雞、嘉美醉雞、四川麻辣、大魚頭鍋，最平 $68。要足料又豐富，推介呢個金屋藏嬌！大廚先以金華火腿、新鮮嘉美雞及豬肉等熬成基本湯底，再加入花膠、牛肝菌、雞髀菇，瑪卡、竹笙再煮成，款款都係矜貴材料！湯底本身已經好甜，打邊爐時再加埋跟湯底的半隻嘉美雞及冬瓜環，味道更加鮮甜濃郁。

【火鍋精選】 米綫店滋補 2 人雞煲

自家製手打雜錦釀西班牙黑毛豬肉丸 $148/16 粒

打邊爐除咗必食牛肉外，丸類都不可少！品牌特設「FTG 自家手打系列」，部分肉丸用西班牙黑毛豬腩肉、以 3:7 肥瘦肉嘅比例手打而成。呢個雜錦釀西班牙黑毛豬肉丸分別有法國鵝肝、蟲草花火腿蓉及日本南瓜做餡，肉丸鬆化有彈性。

手打鹹蛋西班牙黑豬肉丸 $78/9 粒

鹹蛋蒸肉餅就食得多，Fresh to Go 將呢個家常餸變成肉丸打邊爐。肉丸同樣以西班牙黑豬打成，豬肉丸混入了細細粒嘅鹹蛋，味道鹹香好特別！

新鮮牛胸尖 $88/150g

親朋好友總有一、兩個係牛魔王！食得刁鑽啲，推介牛胸尖！呢塊好似牛脂肪嘅物體，其實是牛胸前肋骨上嘅筋膜肌肉，每隻牛只有一小塊。淥起嚟感覺好似好硬，但食落口感爽脆又有牛肉及牛油香，會食上癮！

女兒紅浸手切牛肉 $148/150g

肉質嫩幼的牛脊肉切薄片後以陳年花雕浸半小時，酒味濃而不苦，輕灼 30 秒食得。

膳醉嘉美雞湯 1 人火鍋餐 $168

最新推出的一人火鍋餐，分別有以嘉美雞、杞子、當歸等藥材，加花雕酒煮成的膳醉嘉美雞湯，及用北海道薯仔、番茄、大量魚肉、魚骨餚製的番茄薯仔魚湯，以及用咗粟米、新鮮蘿蔔及豬骨煮成的粟米蘿蔔豬骨湯選擇。一兩個人打邊爐，都有靚湯底。

份量一啲都唔少！有澳洲和牛薄切片及日本鹿兒島黑豚各 3 片、鮮冬菇、蘿蔔、日本魚蛋、芋絲、娃娃菜、西洋菜、金菇、芋絲、京葱、日本豆腐及日本蛋 1 隻，再跟埋豉油、辣椒粒及葱粒，呢個 set 兩個人食都得！提提大家，最低消費 $350，九龍及香港區免運費，新界嘅朋友要買滿 $500 先有得送貨。

Fresh To Go

電話：2866 6881

網頁： http://freshtogo.hk/index.php/

【今期最紅】 型到裂麵館彈牙手拉龍蝦湯麵

海鮮最強│Seamart│

我唔係食神，打邊爐最緊要唔一定係個爐，反而無海鮮不歡！唔好以為網購質素一定差，淨係得急凍雪藏海鮮。2015 年開業的 Seamart 由 4 位 80 後主理，號稱「全港第一間高級海鮮火鍋直送店」。以新鮮海鮮做主打，供應 大眼雞、鮑魚、墨魚仔、蠔、扇貝、桂花蚌、象拔蚌、蟹、蝦及龍躉片等，最少 35 款時令海鮮。點解用海鮮做主打？全因為其中一位負責人於街市經營魚檔，對街市及海鮮的市場好熟悉，做生不如做熟，一於用靚海鮮吸客！

每晚 10pm 前截單，Seamart 店員就會於第二日的凌晨去到香港仔魚市場入貨。負責人仲用盡人情牌，向相熟漁民買本地手釣海鮮，真係去餐廳、酒樓都未必食到咁新鮮。買完海鮮後即時運到門市，到要出柯打的一小時前會有專人劏海鮮、清洗包裝後再冷藏發貨，所有海鮮食材用保鮮紙包好。Seamart 除咗網上落單之外，仲可以電話 order，買滿 $500 免費送貨到港島，九龍及新界則加 $60 運費，去柴灣門市自取有 8 折。