「酥我行」解讀時應看作酥‧我行！就是說酥炸食物我最在行咁解。這裏主打各式台灣夜巿常見的小吃，招牌是酥炸小吃，唔止老正嘅鹽酥雞，仲有酥炸小銀魚、炸金菇、炸四季豆等，一份份好似薯條咁畀大家邊行邊吃，極具人氣。其他還有蚵仔煎、醬油雞、三杯雞球等。
主理的張師傅唔係外行人開小食店，他有 30 多年入廚經驗，中菜、粵菜、川菜、台灣菜都耍家，做小吃當然難不到他，當中仲有好多細節有秘技，例如炸物的炸粉也是自家調製，更有乾粉與濕粉漿之別。「好似鹽酥雞與蠔，要上乾粉炸先會更香口；而豬柳、小銀魚、蔬菜用粉漿炸就能做到外脆內軟。」他說。
炸物的靈魂是油，店子不計成本，炸油日日換！（因為重要，張師傅說了三次），這樣食物才不會有油胼膉味，師傅更堅持要即叫即做：「食物第一次落鑊炸，即能鎖住當中的水分，做到外皮香脆而內裏不會乾身，是新鮮的味道。如果翻炸，食物會流失水分，口感與味道會截然不同。」掃街要掃有質素，可以幫襯呢檔。
香酥棒棒豬 $30
用上幼嫩的豬柳切成條狀炸，醃過的豬柳更具肉香，粉漿相當薄身，吃來是香脆的而非一口粉。
豬肉炸得幼嫩唔會太乾身。
（左起）酥炸四季豆、酥炸本菇、酥炸金菇 各$20
用了蔬菜炸，罪惡感減半，深受女生們熱愛。有圖有真相，炸粉有幾薄，呢張相睇到啦。難得的是香脆的同時，亦不減蔬菜豐富水分，吃來絕不乾身，十分爽口。
招牌鹽酥雞 $30
用上七成無皮加三成有皮的雞髀肉炸，脾肉嫩滑且多肉汁；而雞皮的油分更添香口。灑上店家自調的淮鹽、胡椒鹽或辣粉，味道更具層次。
香辣小銀魚 $30
比一般白飯魚大的小銀魚，先用鹽醃過，否則容易出水影響口感。上脆漿炸得外脆內軟，魚肉較為清新多吃也不覺膩。
炸油用上兩種油混合而成，這樣炸物才能炸出外表金黃，裏面鬆化酥脆的效果。
蚵仔煎 $30
師傅每日親自到街巿挑選新鮮蠔仔，加上蔬菜與粉漿煎。粉漿分量恰到好處；蠔仔粒粒飽滿脹身有光澤，蠔味極濃。
台南醬油鴨胸 $30
以雜菜水、老抽、台灣油膏等自家製成的台南醬油煮鴨胸，與傳統的廣東菜式不同，味道帶甜，而且相當入味。
兩位老闆是小學同學，張師傅自言讀書不成十多歲已入行做廚師，與擁有博士學位的梁老闆二人合作開店。
酥我行
地址：元朗裕榮徑 3-5 號金禧樓地下 5 號舖
電話：6211 2830
營業時間：12nn - 2am，逢星期三休息
文章刊載自U Magazine
